Aqtóbede ekinshi qabattan sekirgen kelinshek eki balasymen dalada qaldy

Aqtóbe qalasynda páter jaldap turǵan Irına Shmıdt shilde aıynan beri aýrýhana jaǵalap júr. Ózin-ózi qorǵaý úshin ekinshi qabattan sekirip ketken kelinshek otadan soń emdelip, bir aı aýrýhanada jatty. Qazir baldaqpen júredi. Eki balasynyń biri qurbysynyń úıinde, ekinshisi janynda. Balabaqsha aqysy tólenbegen soń balasy eshqaıda barmaıdy.
 

«Maǵan ýaqytsha turatyn baspana qajet. Buryn Aqtóbe qalasynda páter jaldap turǵan edim. Ekinshi qabattan sekirip, omyrtqama zaqym kelgen soń páteraqyny tóleı almaı, shyǵaryp jiberdi. Eki balam bar. Tirkeýde joq bolǵan soń balalaryma áleýmettik kómek ala almaı otyrmyn.  Qazir qaıda baryp, kimnen kómek surarymdy bilmeı júrmin. Dalada qaldym, kómek kórseter eshkimim joq. Ázirge qaıyrymdy adamdar qamqorlyǵyna alyp, qart ájeı men shaldyń qasynda júrmin. Olar qartaıǵan, maǵan kómek berýge kelisti»,- dedi Irına Shmıdt.

Aýrýhanadan shyqqan soń barar jer tappaǵan aqtóbelik kelinshek, birge emdelgen qarııaǵa telefon shalyp, kómek suraǵan. Sodan beri sonyń úıinde turyp jatyr.

«Osy jyldyń 21 shildesi kúni qurbymnyń úıine baryp, tańǵa jaqyn úıime qaıta oralǵym keldi. Tań atyp kele jatty. Aldymda eki er adam kórindi. Alǵashynda qoryqtym, keıin tıise qoımas dep oıladym. Aldymen aıqaılap, janynan ótip bara jatqan meni shashymnan tartyp qaldy. Eki ret basymnan uryp, aýzymdy japty. Sóıtip meni páterge ákelip, esikti jaýyp aldy. Biri qolyna pyshaq ustady. Qoryqqannan saqtanýdyń jolyn izdeı bastadym. Sol kezde terezeniń, balkonnyń ashyq turǵanyn kórip, oılanbastan sekirip kettim. Sol jerden meni aýrýhanaǵa alyp ketti. Kúdiktilerdiń biri ustaldy, biri qashyp júr. Qylmystyq is tergelip jatyr»,- dedi Irına Shmıdt.

Ózin qorǵaımyn dep sekirip ketken kelinshek úı jóndeý jumystaryn júrgizip, eki balasyn baqqan. Balasynyń úlkeni 15 jasta, kishkentaıy 5-te. Kúıeýi qaıtys bolǵan. Qazir tabysy joq, jumysqa jaramsyz. Kúzde ony taǵy bir em kútip tur.   

Aıta keteıik, Aqtóbe oblysy ákiminiń janyndaǵy áıelder isi, otbasy jáne demografııalyq saıasat jónindegi komıssııanyń hatshysy Aqmaral Hon daǵdarys ortalyǵyna baryp, ýaqytsha turaqtaýǵa bolatynyn jetkizdi. Bul ortalyqta quqyqtyq keńes berilip, 6 aı panalaýǵa múmkindik bar. Qazir jalǵyz qalǵan áıel balalarynan aıyrylyp qalýdan qorqady. Turar mekeni, tabysy joq adam aqtóbelikterden kómek surady.

Eske salsaq, buǵan deıin Irına Shmıdt Halyqqa qyzmet kórsetý ortalyǵynda 1840 jyly týǵan degen anyqtama alyp, ábigerge túsken bolatyn.