Aqtóbede eki jasóspirim sýǵa batyp ketti
Aqtóbe Tótenshe jaǵdaılar departamentiniń qutqarý qyzmetine Almaty aýdany Aqtóbe ferroqorytpa zaýyty aýmaǵyndaǵy kópir mańynda 2 jasóspirim sýǵa batyp ketkeni týraly habarlama tústi. Olar tyıym salynǵan aýmaqta shomylǵan.
«Qutqarýshylar oqıǵa ornyna jetken kezde 3 bozbalany aǵys alyp ketkeni belgili boldy. Bireýi óz kúshimen jaǵaǵa shyqqan. Aldyn ala belgili bolǵany –16 jastaǵy jasóspirimder júzý bilmegen. Súńgýirler saǵat 16:30-da jaǵadan 100 metr, tereńdigi 3,5 metr bolatyn jerden jasóspirimderdiń denesin shyǵardy», - dep habarlady oblystyq TJD baspasóz qyzmetinen.
Aıta keteıik, 4 maýsym kúni de qaıǵyly oqıǵa bolǵan edi. Aqtóbe qalasy Almaty aýdany Elek ózenine 39 jastaǵy er adam batyp ketti. Ol da ruqsaty joq jerge shomylǵan. Súńgýirler jaǵadan 15 metr qashyqtan, 4,5 metr tereńdikten onyń denesin alyp shyqty. Er adam otbasymen demalýǵa barǵan. «Qazirgi kezde áleýmettik jelide ol balany qutqaryp, ózi sýǵa batyp ketkeni týraly aıtylyp jatyr. Bul aqparatty qosymsha tekseremiz», - dep habarlady oblystyq TJD baspasóz qyzmetinen.
Eske salsaq, 3 maýsym kúni qalada 10 jastaǵy bala sýǵa batyp ketti. Ol oınap júrip, ózenge qulaǵan. Sondaı-aq Yrǵyz aýdanynda buzaý izdeýge shyqqan oqýshylardyń denesi sýdan tabyldy.
