Aqtóbede eki oqýshynyń ólimine sebep bolǵan jol-kólik apatynan soń qylmystyq is qozǵaldy
Shalqar-Bozoı jolynda, ıaǵnı, Shalqar qalasynan 4 shaqyrym qashyqtyqta jeńil kólik aýdarylyp, onyń ishinde bolǵan eki qyz kóz jumdy. Qazirgi kezde polıtsııa oqıǵa boıynsha is qozǵap, birneshe saraptama taǵaıyndaldy.
«Oqýshy ákesiniń kóligin alyp, jol-kólik oqıǵasyna tap boldy. Qazirgi tańda oqıǵa boıynsha Qylmystyq kodekstiń 345-baby 4-bólimi boıynsha is qozǵaldy. Rýlde bolǵan bala, ata-anasy jaýapkershilikke tartyla ma degen suraq jaýaby tergeý kezinde anyqtalady. Saraptama taǵaıyndaldy. Іshimdik ishti degen derek joq. Ákesi kólikti balasynyń aıdap ketkenin bilmegen. Ol kezde úıde bolmaǵanyn aıtyp otyr. Sózine qaraǵanda uly buryn-sońdy kólikti júrgizbegen. Tekserý kezinde kólik joldan shyǵyp, aýdarylyp qalǵany kórinedi. Naqtysy saraptamadan soń aıtalady», - dedi oblystyq Jergilikti polıtsııa basqarmasynyń bastyǵy Ardana Saımaǵambetov.
Onyń aıtýynsha, is oqıǵa boıynsha qozǵalǵan soń ázirge kúdikti joq. Ol kólik ishinde bolǵan 9-synyp oqýshylarynyń bári bir mektepte oqıdy.
«Es-tússiz jatqan oqýshy qyz aýrýhanaǵa jetkizilgen soń birden ókpeni jasandy jeldetý apparatyna qosyldy. Sanavıatsııa qyzmeti birden onlaın baılanysqa shyǵyp, keńes berdi. Basynan qatty soqqy alyp, mıyna qan quıylǵan. Jaraqaty aýyr bolyp, bir táýlik ishinde qaıtys boldy. Eki er balany travmatolog mamandar qarap, oblystyq aýrýhanaǵa jetkizdi. Jaǵdaıy ortasha. Em alyp jatyr. Aıaqtary synǵan. Olar tósekte jatyr. Basynan da zaqym alǵan. Nevropatolog ta baqylaýyna aldy», - dedi oblystyq densaýlyq saqtaý basqarmasy basshysynyń orynbasary Baqyt Túlkibaeva.
Aıtyp óteıik, aýrýhanada jatqan eki balanyń biri rýlde bolǵan.
Bıyl eki aıda kámelet jasqa tolmaǵan balalardyń qatysýymen 14 jol-kólik oqıǵasy boldy. Altaýy qaza taýyp, 16-i jaralandy.
