Aqtóbede eki kúnge sozylǵan dala órti sóndirildi
Aqtóbe oblysy, Áıteke bı aýdany, Qaıraqty aýyldyq okrýginde dalalyq jerde órt shyqqany týraly habarlama 7 tamyz kúni tústi. Oqıǵa ornyna aýdandyq órt sóndirý qyzmetinen 3 adam jiberildi. Sonymen birge erikti túrde 7 adam bardy. Qarabutaq orman sharýashylyǵynan da qyzmetkerler kómektesti.
«Órt 8 tamyz kúni sóndirildi. Aýdany 49 gektardy qurady. Alaıda 8 tamyz kúni saǵat 11:38-de monıtorıng júrgizilip, ottyń qaıta tutanǵany baıqaldy. Órt sóndirýge T.Júrgenov aýylynan 5, Qarabutaq aýylynan 6, Qaıraqty aýylynan 34 tehnıka men 72 adam jumyldyryldy. Órt sóndirý jumysy eki kúnge sozyldy. Búgin tańǵy saǵat 3:00-de tolyq sóndirildi. Dala órtiniń aýdany 15 myń gektardy qurap otyr», - dedi oblystyq TJD bastyǵy Marǵulan Amanbaev.
Ázirge órttiń shyǵý sebebi belgisiz. Adamı faktor bolýy múmkin. Sonymen birge tótenshe jaǵdaılar qyzmeti naızaǵaıdan ot tutanýy múmkin degen nusqany da joqqa shyǵarmady.
