Aqtóbede eki kólik soqtyǵysyp, kólikten túsip qalǵan jolaýshy kóz jumdy
AQTÓBE. QazAqparat – Aqtóbede «Lexus» pen GAZel soqtyǵysyp, birinen jolaýshy túsip qaldy. Ol aýrýhanada kóz jumdy, dep habarlaıdy QazAqparat tilshisi.
Oqıǵa Aqtóbe qalasynda bolǵan. «Lexus» avtokóliginiń júrgizýshisi 41-razezden Zınchenko kóshesi baǵytymen kele jatyp, qarama-qarsy jolǵa shyqty. Sol kezde burylmaq bolǵan GAZeldi kórmeı, soqtyǵysty. Jol apatynan keıin «Lexus» kóliginiń júrgizýshisi toqtamaı, belgisiz baǵytqa ketip qalǵan. Saldarynan sol mashınanyń 29 jastaǵy jolaýshysy salonnan túsip qalyp, jol jıegine qulaǵan.
«Jaraqat alǵan adam jedel járdem aýrýhanasynyń jansaqtaý bólimine jatqyzyldy. Ol alǵan jaraqatynan esin jımaı, kóz jumdy. Polıtsııa qyzmetkerleri keshendi izdeý is-sharalaryn júrgizdi. Nátıjesinde 28 jastaǵy kólik júrgizýshisi ustaldy. Anyqtalǵandaı, ol osy jyldyń mamyr aıynda júrgizýshi kýáliginen aıyrylǵan. Qazir Qylmystyq kodekstiń «Jol qozǵalysy erejesin buzý» baby boıynsha sotqa deıingi tergeý bastaldy. Júrgizýshi Aqtóbe qalasy PB ýaqytsha ustaý ızolıatoryna qamaldy», - dedi oblystyq PD baspasóz qyzmetiniń jetekshisi Erbolat Sarqulov.
