Aqtóbede «Eki ezý» teatry oblystyq fılarmonııa ujymyna qosyldy
AQTÓBE. QazAqparat - Aqtóbedegi «Eki ezý» satıra teatry Ǵazıza Jubanova atyndaǵy oblystyq fılarmonııa ujymyna qosyldy, dep habarlaıdy QazAqparat tilshisi.
«Eki ezý» satıra teatry 2001 jyly qurylyp, 17 adam jumysyn bastady. Al 2013 jyly satıra teatry Tahaýı Ahtanov atyndaǵy drama teatrdyń quramyna qosyldy. Bıyl satıra ártisteri Ǵazıza Jubanova atyndaǵy oblystyq fılarmonııa ujymynyń quramyna engizilip jatyr. Kórkemdik jetekshi qyzmetin Nurlybek Jubatqan atqarady. Satıra teatryn bólip, fılarmonııa ujymyna qosý týraly usynys oblys ákimi Berdibek Saparbaevqa joldanǵan.
«2013 jyly Aqtóbede mádenıet oshaqtaryn ońtaılandyrý júıesimen «Eki ezýdi» T.Ahtanov teatryna qosty. Dırektor, bas esepshi men dırektordyń orynbasary qyzmeti qysqardy. Odan ózge mamandar Tahaýı Ahtanov atyndaǵy drama teatrdyń quramyna ótip, trýppa bolyp tirkeýli turdy. ıAǵnı, Aqtóbeniń brendine aınala bastaǵan shyǵarmashylyq ujymnyń aıasy tarylyp, qyp-qyzyl qııanat jasaldy. Ózim irgetasyn qalaǵan «Eki ezýdiń» taǵdyryn oılasam, áli kúnge ishimdi ıt tyrnaıdy. 1998 jyly naryqtyń áserinen turmysy nasharlaǵan halyqty kúlkimen kóńilin kóterip edi. Teatrdyń «Aıtqyshtar Aqtóbede», «Qazaqtyń qaljyń ánderi-aı», «Án saraıy», «Aqtóbefılm» atty jobalary jáne «Aq tóbeteı» atty qýyrshaq otaýy boldy», - dep jazdy Nurlybek Jubatqan óz usynysynda.
Ol óz sózinde satıra janryn damytý, «Eki ezýdi» Aqtóbeniń brendine aınaldyrý jolyn tańdaǵanyn aıtty.
«Aqtóbe oblysynyń ákimi Berdibek Saparbaevtan «Eki ezýdi» satıra teatry etip qalpyna keltirip, qazaq satırasyna qamqorlyq jasaýdy suradym. Aqtóbede teatr janynan kınostýdııa ashqymyz keledi. Balalarǵa arnalǵan mýltfılmder shyǵarý týraly da oıymyz bar»,- dedi ol.
Qazirgi ýaqytta ujym fılarmonııa quramyna ótip jatyr. Biraq ujymnyń negigi armany - derbes teatr bolyp qurylyp, jumysty jetildirý.
