Aqtóbede eki balasymen joǵalyp ketken áıel tabyldy
AQTÓBE. QazAqparat - Aqtóbe oblysy, Baıǵanın aýdany, Jarqamys aýyldyq okrýginde turatyn Jeńisgúl Jumasheva tabyldy. Taldyqorǵandaǵy Saryózek aýylynda júrgen kelinshekti polıtsııa qyzmetkerleri Aqtóbe oblysyna jetkizdi, dep habarlaıdy QazAqparat tilshisi.
Aqtóbe oblysy, Jarqamys aýyldyq okrýgi, Qyzyljar aýylynan ótken jyldyń qazan aıynda shyǵyp ketken Jeńisgúl Jumasheva elimizdiń ózge óńirinen tabyldy. Ol Saryózek aýylynda jumys istep júrip, balasynyń týý týraly kýáligin joǵaltyp alǵan. Sodan týǵan aýylyna qaıta oralmaǵan.
«Jeńisgúl Jumasheva jumys istep, balasynyń kýáligin joǵaltyp alǵan kezde poıyzǵa bılet ala almaǵan. Keıin kólik polıtsııasy kómektesip, ony Baıǵanın aýdanyna deıin ákeldi»,- dedi Aqtóbe oblystyq ІІD baspasóz qyzmeti.
Eske salsaq, Jeńisgúl Jumasheva 6 jáne 8 jastaǵy ul-qyzymen birge belgisiz baǵytqa ketip qalyp, qys aılarynda tabylmady.
Polıtsııa 27 jastaǵy kelinshektiń joǵalǵanyn habarlap, jan-jaqqa aqparat taratty. Al Jarqamys aýyldyq okrýgi ákimdiginiń habarlaýynsha, Jeńisgúl Jumasheva ketip qalǵan soń kúıeýi qaıtys bolǵan.
