Aqtóbede eki balany qum basyp qalý oqıǵasyna qatysty sot bastaldy
AQTÓBE. QazAqparat - Aqtóbe qalalyq sotynda jaǵajaı basshysyna qatysty qylmystyq is qaralyp jatyr. Jábirlenýshi tarap balanyń dári-dármegine arnalǵan materıaldyq shyǵyndy tolyq óteýdi surap otyr, dep habarlaıdy QazAqparat tilshisi.
Aqtóbe qalasynda 1 jáne 2 jastaǵy bala jaǵajaıdaǵy topyraq astynda qalyp, jedel aýrýhanaǵa jetkizilgen bolatyn. Oqys oqıǵadan keıin Qylmystyq kodekstiń «Qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetter kórsetý» baby boıynsha is qozǵalyp, jaǵajaı qojaıyny Arman Qazbaev sot aldynda jaýap berip jatyr. Aıyptaý qorytyndysyna súıensek, «Іnjý» jekemenshik jaǵajaıy qaýipsizdik talaptaryn saqtamaı qyzmet kórsetken. Tipti, ákimdikke tıesili jerdi zańsyz ıemdenip, tynyǵýǵa arnalǵan shatyr tigedi. Al demalýǵa barǵan otbasynyń eki balasy qum astynda qalyp qoıǵan.
«Sot-medıtsınalyq saraptama qorytyndysyna súıensek, Z.Ermeıchýk qum astynda qalyp, keýde tusyna, qabyrǵasy, búıregi men baýyryna zaqym keldi. Sonymen qatar, jabyq bas-mı jaraqatyn aldy. Denedegi aýyr jaraqat balanyń ómirine qaýip tóndirdi. Otbasyndaǵy ózge adamdar jeńil jaraqat aldy», - dedi aıyptaý qorytyndysyn oqyǵan prokýror Meńdibaev.
Sot otyrysy kezinde jábirlenýshi Anastasııa Eremeıchýk qumnyń astynan balasyn qalaı qazyp alǵanyn aıtyp berdi.
«Sol kúni tynyǵýǵa jaǵajaıǵa barǵan bolatynbyz. Biz úshin arnaıy shatyr turdy. Eki balammen baryp, úlken qyzymdy balalarmen oınaýǵa jiberdim. Bir kezde gúrs etip, shań kóterildi. Artyma qaraǵan kezde kishkentaı qyzymnyń tek bas kıimi kórindi. Júgirip baryp, qyzymdy qazyp alýǵa kiristik. Birinshi qulaǵyn kórip, jyldam áreket ettik. Bul óte qorqynyshty tús sııaqty, áli kúnge deıin balam shoshyp oıanady. Qyzym qumnyń astynda es-tússiz, kókpeńbek bolyp jattty. Sý shashyp, jasandy tynys alýǵa kómektestim. Sol kezde jedel járdem shaqyryldy. Ýaqyt ótkizip almaý úshin óz kóligimizben jol boıyna shyqtyq», - dedi ol. Jábirlenýshi tarap balaǵa áli de ońaltý sharasy qajet ekenin, sottalýshylardyń dári-dármekke qajetti barlyq shyǵyndy óteýin surady. Olar ázirge moraldyq ótemaqy kólemin atamady.
Sot otyrysy jalǵasyp jatyr.
