Aqtóbede eki aıaǵynan aıyrylǵan temirjolshy áıel komıssııa qorytyndysymen kelispedi
Osy jyldyń 19 tamyzy kúni Shalqar aýdanynda oqys oqıǵa tirkelgen bolatyn. 33 jastaǵy kelinshek poıyz astyna túsip, aýyr jaǵdaıda aýrýhanaǵa jetkizildi. Keıin onyń týǵan-týystary túsinik berdi. Arada eki aı ótkende zardap shekken temirjolshy es jıyp, komıssııa sheshimen kelispeıtinin aıtyp berdi.
«Úsh balanyń anasymyn, temirjolshymyn. Shalqar stansasynyń kezekshisi bolyp jumys isteımin. Osy jyldyń 19 tamyz kúni túngi kezekshilikten shyǵyp, jolaýshylar poıyzynyń astyna túsip qaldym. Eki aıaǵymnan birdeı aıryldym. Eki aıdan beri endi esimdi jıyp, óz-ózime kelip jatyrmyn. Áli de aldymda birneshe ota kútip tur. Bul oqıǵa qalaı boldy? Kim kináli? Bul suraqtarǵa jaýapty ózimnen artyq eshkim bilmeıdi.
Temirjoldyń jumysy óte aýyr, mıyń tynyqpasa bolmaıdy. Al men sońǵy aptada qatarynan 5 kún túngi kezekshilikte turdym. Adam jetispegendikten 3 adam ǵana kezekshilikte júrgenimiz taǵy bar. 18 tamyz kúni túngi kezekshiligim óte aýyr boldy. Jumysymdy bir jutym sý ishpeı atqaryp shyqtym jáne buǵan deıingi basshymnyn kórsetken moraldyq qysym bar qatty sharshap, jumysty aıaqtadym. Sondaı álsirep kele jatyp, poıyzdyń astyna qalaı qulap ketkenimdi bilmedim. Tek keýdemdi kóterip, shyǵa aldym. Osydan keıin is qozǵalyp, tergeý bastaldy. Oblystyń eńbek ınspektsııasyna shaǵymdandym. Komıssııa quryldy. Biraq komıssııa ózimdi kináli qylyp shyǵardy. Meniń bundaı kúıge qalaı túskenimdi teksermedi. Tekserýge qatysty kúmánim kóp, aldaǵy ýaqytta sotqa shaǵymdanamyn. Osy máseleni oblystyq prokýratýra jan-jaqty tekserip, adal sheshim shyǵarsa eken deımin. «Qazaqstan temirjoly» UK» AQ basshylyǵyna bul sýıtsıd emes, óndiristik jaǵdaı ekenin aıtamyn», - dedi Gúljanat Buharbaeva.
Aqtóbe oblystyq eńbek ınspektsııasy basqarmasy bul bir mamannyń emes, komıssııa sheshimi dep otyr. Qorytyndysy – óndiristik jaraqat emes.
«Komıssııa quramynda úsh adam bar. Olar: eńbek ınspektory, kásipodaq pen temirjol stansasynyń basshylyǵy. Gúljanat Buharbaeva 7 jyldan astam ýaqyt osy qyzmette eńbek etken. Tańerteń jumystan shyǵady, kezekshiligin tapsyrady. Keıin úıine barý úshin joldy belgilenbegen jermen kesip ótip, arǵy betke ótetin esik jabyq turǵan soń stansaǵa qaıta oralady. Qaýipsizdik erejesin biletin temirjolshy taǵy da belgilenbegen jermen ótip, poıyz qozǵalǵan kezde qulap qalǵan. Komıssııa qorytyndysy boıynsha bul óndiristik jaraqat emes. Sebebi ol dál sol jerde jumys berýshiniń tapsyrmasymen júrgen joq. Negizi kezekshilik qyzmette 7 adam tirkeýde tur. Onyń biri bala kútimimen otyr, ekinshisi kezekti eńbek demalysynda. Bes adam jumys istep, aýysqan. Kezekshilerdiń jumys kestesi saqtalmaǵany ras. Eńbek kodeksi boıynsha aýysym men demalys arasy 12 saǵattan kem bolmaýy tıis. Bul talap saqtalǵan», - dedi Aqtóbe oblystyq eńbek ınspektsııasy basqarmasynyń bólim basshysy Talǵat Iskarın.
