Aqtóbede eki aýylǵa gaz tartyldy
AQTÓBE. QazAqparat – Áıteke bı aýdanynyń Jarótkel jáne Aqkól aýylynyń turǵyndary endi kógildir otyn tutynady, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Oblys ákimi Ońdasyn Orazalın Áıteke bı aýdanyna jumys saparymen bardy. Sapar barysynda Jarótkel aýylynda gaz taratý stantsııasy iske qosyldy.
«Elimizdiń damyp, órkendep kele jatqany óreli isterdiń atqarylýymen aıqyndalady. Óıtkeni árbir qazaqstandyqtyń áleýmettik jaǵdaıy jaqsaryp, qalypty ómir súrýine memleketimizde kóp kóńil aýdarylyp keledi. Sonyń bir mysaly, Áıteke bı aýdanynda sońǵy jyldary eldimekenderdi gazdandyrý jumysy qarqyndy júrgizilip kele jatyr. Memleket basshysy Qasym-Jomart Toqaevtyń Qazaqstan halqyna arnaǵan Joldaýynda da basty baǵyt áleýmettiń áleýetin arttyrý jaıyna aýdarylǵan. Gaz qurylysynyń jumysyn júrgizgen qurylysshylarǵa alǵys aıta otyryp, aýyl turǵyndaryn jaǵymdy jańalyqpen quttyqtaımyn», - dep atap ótti aımaq basshysy.
Qazirgi kezde Áıteke bı aýdany turǵyndarynyń 33,5 paıyzy gaz tutynyp otyr. Aýdandaǵy Jambyl, Taldysaı aýyldarynda aýylishilik gaz qubyry jelileriniń qurylysy bastalǵan. Qumqudyq, Araltoǵaı aýyldaryna gaz qubyryn tartýǵa qajetti jobalar ázirlenip jatyr. Jyl sońyna deıin Áıteke bı aýdanyndaǵy 28 aýyldyń beseýi gaz paıdalanady.
Aıta keteıik, óńir basshysy Araltoǵaıdaǵy aýylishilik sý qubyry qurylysy jumystarymen tanysty. Jóndeý jumysyna 100 mln teńge bólingen. «QazPromStroı» kompanııasy uzyndyǵy 10,6 shaqyrymdy quraıtyn qubyrdy toǵyz aıda jóndep shyǵady. Ońdasyn Orazalın aýyldyq mádenıet úıinde turǵyndarmen kezdesý ótkizdi. Jıynda Áıteke bı aýdanynyń ákimi Mádı Eleýsizov óńirdiń áleýmettik-ekonomıkalyq damýy jaıly baıandap, aldaǵy ýaqytta atqarylatyn josparlarymen bólisti. Oblys ákimi jergilikti halyqtyń muń-muqtajyn muqııat tyńdap, ınternetpen qamtý, mal jaıylymy, kógildir otyn, aýyz sýǵa qatysty qoıǵan saýaldaryna tolyqtaı jaýap berdi.
«Áıteke bı aýdany – oblys ekonomıkasynyń damýyna eń úlken úlesin qosyp otyrǵan jáne agrarlyq aýdandardyń biri. Qazirgi tańda aýdandarǵa, sonyń ishinde eldimekenderge kóp kóńil bólinýde. Infraqurylymdyq, áleýmettik máseleler eń basty nazarda. Áıteke bı aýdanynda aıtarlyqtaı problemalar joqtyń qasy. Degenmen, sheshilýdi qajet etetin keıbir máseleler de bar. Basty maqsat – el bolyp, jurt bolyp eńbek etý, keleshekke senimmen qadam basý úshin birge jumys isteý»,-dedi O.Orazalın.
Óńir basshysynyń jumys sapary Aqkól aýylynda jalǵasty. 716 turǵyny bar eldimekende gaz qubyry iske qosyldy. Uzyndyǵy 40,8 shaqyrymdy quraıtyn gaz qubyrynyń aýyl ishine taratý jumystarymen «Mýkanov ı K» JShS atqardy.
