Aqtóbede eki aýylda brýtsellezge baılanysty shekteý sharalary jarııalandy
Oıyl aýdanynyń eki aýylynda qańtar aıynan beri karantın. Munda iri qara men usaq maldan brýtsellez anyqtaldy. Mamandar karantınniń qaı ýaqytta joıylatynyn dál aıta almaı otyr. Shyǵanaq Bersıev aýyldyq okrýginiń ortalyǵy Qaratal men Saraljyn aýyldyq okrýginiń ortalyǵy Kemer aýylynyń turǵyndary úshin bul jaǵymsyz jańalyq boldy.
«Aýyldaǵy 38 úıdiń malynan brýtsellez derti anyqtaldy. Barlyǵy 1915 múıizdi iri qaradan qan alynyp, onyń 78-nen oń nátıje shyqty. KamAZ kóligimen Aqtóbe qalasyna jóneltip jatyrmyz. Erteń sońǵysyn jóneltip, qaıtadan qan alý jumysy júrgiziledi. Negizi, ótken jyly kúzde maldan qan alyndy. Sol kezde 10 bas iri qaradan brýtsellez anyqtalǵan edi. Saldarynan bıyl óli tól tirkeldi»,- dedi Qaratal aýylynyń mal dárigeri Aıdarbek Baqtyǵalıev.
Mal dárigerleri ekinshi ret qan alý jumystaryn bastady. Eger bári sátti aıaqtalsa, araǵa 21 kún salyp qaıtadan qan alynady. Eki ret qan alynǵan soń shekteý sharalary joıylady. Ázirge maldy jaıylymǵa jiberýge bolmaıdy.
Aıta keteıik, Qaratal men Kemer aýylyna 4 qańtar kúni shekteý sharalary jarııalandy. Qarataldan 78, Kemerden 21 bas aýrý mal anyqtaldy. Respýblıkalyq epızotııaǵa qarsy kúres jasaǵynyń oblystyq fılıaly mamandarynyń aıtýynsha, Qaratal aýylynda usaq malǵa da shekteý sharalary jarııalanyp otyr. Ázirge usaq mal basynyń naqty sany belgisiz. Sebebi, aýylda usaq maldyń sany ortaq bazaǵa engizilmegen. Aldymen sany anyqtalyp, keıin qan alý jumysy júrgiziledi.
