Aqtóbede eki adamnyń ólimine 16 aıyptalýshy jaýap beredi
Oqıǵa byltyr qazan aıynda boldy. Aqtóbedegi Elek ózeniniń jaǵasynan eki adamnyń denesi tabyldy. Ekeýin de qınap óltirgen. Aqtóbe oblysy prokýrorynyń kómekshisi Órken Eşanovtyń habarlaýynsha, habar aldymen qalalyq polıtsııa bólimi jedel basqarý ortalyǵyna túsken. Onda Keńes Nokın dańǵyly boıynda ornalasqan «Oazıs» monsha keshenine qarsy bettegi Elek ózeniniń jaǵasynda belgisiz adamdardyń denesi tabylǵany aıtyldy.
«Kelip túsken aqparatty tekserý úshin oqıǵa ornyna oblys prokýrory men jedel tergeý toby bardy. Aǵashtar arasynan 1991 jyly týǵan A. Kóshkimbaev jáne 1995 jyly týǵan S. Týleýovtyń denesi tabyldy. Ekeýin de qınap óltirgenin dáleldeıtin belgi bar. Sol sebepti, atalǵan derekke baılanysty Almaty aýdany №3 qalalyq polıtsııa bólimi Qylmystyq kodekstiń 99-baby 1-tarmaǵy 2-bóligi negizinde sotqa deıingi tergep-tekserýdi júrgizdi. Qylmystyq is boıynsha protsess prokýrory taǵaıyndaldy», - degen bolatyn Aqtóbe oblysy prokýrorynyń kómekshisi Órken Eşanov.
Al búgin oblystyq sottyń baspasóz qyzmeti istiń sotqa túskenin habarlady.
«Qylmystyq ister jónindegi mamandandyrylǵan aýdanaralyq sotyna «Mıllıoner» túngi klýbyndaǵy adam ólimine qatysty is tústi. Barlyǵy 16 aıyptalýshy, olardyń arasynda klýb qyzmetkerleri de bar. Qylmystyq kodekstiń «Adam óltirý», «Buzaqylyq», «Adamdy urlaý» baptarymen is qaralady. Klýb qyzmetkerine qylmysty jasyryp, der kezinde habar bermegeni úshin aıyp taǵylyp otyr. Aıyptalýshylardyń jasy 18-29 jas aralyǵynda. Al klýb qyzmetkeri 35 jasta. Barlyǵy 6 jábirlenýshi bar. Onyń ekeýi qaza bolǵan. Sot aldy tyńdaý ýaqytyn qosymsha habarlaımyz», - dedi oblystyq sottyń baspasóz qyzmeti.
