Aqtóbede eki jyl burynǵy sý tasqyny kezinde jaramsyz bolyp qalǵan kópir jańǵyrtyldy
AQTÓBE. KAZINFORM — Qurylys jumystaryna 3 mlrd teńgeden astam qarjy jumsaldy. Jańǵyrtý jumystary kezinde aldymen eskisi buzylyp, tireýi nyǵaıtyldy.
Aqtóbe oblysynyń Oıyl aýdanyna kireberistegi kópir 2024 jyldaǵy sý tasqyny kezinde jaramsyz bolyp qaldy. Sol kezde TJM aýyl halqyn ponton kópir arqyly tasymaldaýdy jón sanady. Buǵan deıin tek áskerı oqý-jattyǵýda paıdalanǵan jyljymaly kópir birneshe aı Oıyl halqyn oblys ortalyǵy, aýyldarmen baılanystyrdy.
Keıin kópirge saraptama jasalyp, jańǵyrtý jumystaryn júrgizýge sheshim qabyldandy.
Búginde jumys tolyq aıaqtalyp, kópir qoldanysqa berilgen.
— 2024 jyly shilde aıynda «Tengızstroıservıs Grýpp» JShS-men kelisimshart jasalyp, qurylys jumystary bastaldy. Qoldanystaǵy kópirdi bólshekteý jumystary júrgizildi. 2025 jyldyń qańtar aıynda nysannyń jobalyq-smetalyq qujattamasyn ázirleý aıaqtalyp, saraptamanyń oń qorytyndysy alyndy. Nysannyń jalpy quny — 3,2 mlrd teńge. Qaıta jańartylǵan kópirdiń uzyndyǵy — 280 metr. Qurylys barysynda 70 qada qaǵylyp, onyń 30-dan astamy 26-38 metr tereńdikke ornatyldy. Kópirdiń 8 tireýi tolyq turǵyzylyp, 8 tireý aralyǵyna 56 arqalyq ornalastyryldy, — dep habarlady Aqtóbe oblysy ákiminiń baspasóz qyzmeti.
Buǵan deıin habarlaǵanymyzdaı, el zańnamasy boıynsha qalpyna keltirý jumysy tolyq aıaqtalǵannan keıin ǵana tótenshe jaǵdaı rejımi joıylady. Máselen Aqtóbe qalasy men oblystyń tórt aýdanynda 2024 jylǵy sý tasqyny kezinde jarııalanǵan tótenshe jaǵdaı rejıminiń kúshi áli joıylmady.
