Aqtóbede eki temirjolshyny kúıik shalyp, jansaqtaý bólimine tústi
AQTÓBE. KAZINFORM — Eki temirjolshy da qazir Shalqar aýdandyq aýrýhanasynda em qabyldap jatyr. Eńbek ınspektsııasy komıssııa quryp, tekserýdi bastady.
Oqıǵa Aqtóbe oblysy Shalqar qalasynda boldy. Jábirlenýshiniń qyzy Almagúl Qasymovanyń aıtýynsha, qazir ákesiniń jaǵdaıy aýyr. Ol denesiniń 80 paıyzyn kúıik shalǵanyn aıtty.
— Tynys alý joldary da zaqymdanǵan. Qazirgi ýaqytta ákemniń jaǵdaıy óte aýyr. Biz bul oqıǵanyń jaı ǵana umytylyp ketkenin qalamaımyz. Oqıǵanyń barlyq mán-jaıy jan-jaqty, ádil ári ashyq tekserilip, jaýapty tulǵalardyń áreketine zań aıasynda baǵa berilýin talap etemiz, — dep jazdy Almagúl Qasymova.
Aqtóbe oblystyq densaýlyq saqtaý basqarmasynyń habarlaýynsha, eki naýqas ta jansaqtaý bólimine jatqyzyldy. Olardyń jaǵdaıy aýyr. Zardap shekkenderge barlyq medıtsınalyq kómek kórsetilip jatyr.
Al eńbek ınspektsııasy tekserýdi bastady.
— Oqıǵa 13 qazan kúni Shalqar aýdanynda boldy. QTJ mekemesine qarasty ekpe aǵashtar dıstantsııasynyń eki qyzmetkeri zardap shekti. Jaǵdaı jumys ýaqytynda boldy. Qyzmetkerler aýrýhanada. Qazir tergep-tekserý bastaldy, — Aqtóbe oblystyq eńbek ınspektsııasy departamenti basshysynyń orynbasary Talǵat Iskarın.
QTJ baspasóz qyzmeti de bolǵan oqıǵany rastady jáne tekserý jumystary bastalǵanyn málimdedi.
Eske salsaq, Aqtóbede temirjolshy jumys ornynda jaraqat alyp, tósekke tańylyp qaldy. Oqıǵa 2025 jyldyń qazan aıynda Hromtaý aýdanyndaǵy Nıkeltaý stansasynda boldy.
