Aqtóbede stýdenttiń ólimine qatysty is sotta qaralyp jatyr

AQTÓBE. KAZINFORM – Aqtóbede stýdentti óltirdi degen kúdikke iligip, tergeý ızolıatoryna qamalǵan 6 jigit búgin sot zalyna jetkizildi. Olarǵa Qylmystyq kodekstiń «Adam óltirý» baby boıynsha aıyp taǵylyp, aıyptaý aktisi oqyldy.

Oqıǵa bıyl qańtar aıynda boldy. Іs materıalyna súıensek, Aqtóbe qalasy Aqjar eldimekeniniń turǵyny Instagram áleýmettik jelisi arqyly Qyzyljar eldimekeniniń turǵynymen sózge kelip qalady. Biri ekinshisinen qyzdyń telefon nómirin suraǵan. Keıin ekeýi qaladaǵy Almaz dúkeniniń janynda kezdesýge ýaǵdalasady. Aıyptalýshy úıinen pyshaq ala shyqqan. Sóıtip jan-jaqtaǵy dostaryna habarlasyp, kezdesip, óz janyna ertedi. Memlekettik aıyptaýshy Azamat Baqytjanov qylmystyq oqıǵa bolǵan kúni birneshe aıyptalýshynyń úıinen pyshaq ala shyqqanyn jetkizdi. Olar dúken aldynda kezdesip, bir-birimen sózge kelip qalǵan eki jigit ózgelerden jyraqqa shyǵyp, sóılesedi. Sózden janjal týyp, sol kezde eki aıyptalýshy jábirlenýshiniń oń jaq jambasynyń artqy tusynan pyshaq suqqan.

- Jábirlenýshi 3 qańtar kúni saǵat 01:24-te kópsalaly aýrýhanada jan tapsyrdy. Tórtinshi dárejeli gemorragııalyq shok alyp, kóp qan joǵaltqannan kóz jumdy, - dedi memlekettik aıyptaýshy Azamat Baqytjanov.

Dúken aldynda jappaı tóbeles bolyp, stýdent kóz jumdy. Eki jigit jaralanyp, aýrýhanaǵa jetkizilgen. Búgin sotaldy tyńdaý kezinde aıyptalýshylar Alqa bılerden bas tartty. Al aıyptalýshylardyń qorǵaýshylary isti tergeýde shıkilik ketkenin aıtyp, isti qaıta tergeýge jiberýdi surady.

Eske salsaq, bıyl 3 qańtarda Aqtóbe qalasynda bir top jigit tóbelesip qaldy.  Qylmystyq oqıǵa kezinde eki jigit kóz jumyp, 6 adam ustaldy.