Aqtóbede eki stýdentten AITV ınfektsııasy anyqtaldy

AQTÓBE. KAZINFORM — AITV ınfektsııasyn juqtyrǵandardyń basym bóligi — er adam. Olar ınfektsııany jynystyq qatynas arqyly juqtyrdy.

AITV
Foto: Pexels

Aqtóbe oblystyq AITV-ınfektsııasynyń aldyn alý ortalyǵynyń málimetine súıensek, bıyl 10 aıda 52 adamnan AITV ınfektsııasy anyqtaldy. Taǵy bireýi — sheteldik. Byltyrǵa qaraǵanda ınfektsııa juqtyryp alǵan adam sany 8%-ǵa ósken.

— Infektsııa juqtyrǵandardyń 40-y — er adam (77%), al 12-si — áıel (23%). Olardyń bireýi ǵana ınfektsııany esirtki tutynǵan kezde juqtyrǵan. Áleýmettik jaǵdaıyn taldasaq, 25-i jumys isteıdi, 24-i jumyssyz. Sonymen birge arnaýly orta bilim berý mekemeleriniń eki stýdentinen jáne bir zeınetkerden AITV ınfektsııasy anyqtaldy. Bıyl AITV dıagnozy qoıylǵandardyń jasy 16 men 66 jas aralyǵynda. Bul aýrýdyń ártúrli jas toptaryna taralyp jatqanyn kórsetedi, — dep habarlady Aqtóbe oblystyq AITV-ınfektsııasynyń aldyn alý ortalyǵy.

Bıyl barlyǵy 193 myńnan astam zerthanalyq zertteý júrgizildi. Nátıjesinde AITV-ny anyqtaý kórsetkishi 8%-ǵa ósti. Sonymen birge 5 000-nan astam ekspress-test júrgizildi. Qazirgi ýaqytta oblystyq AITV ortalyǵynda 617 adam (onyń ishinde 2 shetel azamaty-red.) esepte tur. Olardyń jeteýiniń jasy 18-ge tolmaǵan.

Eske salsaq, Batys Qazaqstan oblysynda 1 qazandaǵy málimet boıynsha, dıspanserlik esepte turǵan, alaıda antıretrovırýstyq (ARV) terapııany qabyldamaǵan 10 patsıent medıtsınalyq baqylaýdan tys qalǵan.