Aqtóbede eki páterden esirtki prıtony anyqtaldy
AQTÓBE. KAZINFORM — Aqtóbede maskúnemder men nashaqorlar uıasy anyqtalyp, páter ıelerine qatysty qylmystyq is qozǵaldy. Onda júrgen 12 adam májbúrli túrde emdeledi.
Aqtóbe qalasynyń ýchaskelik ınspektorlary úı-úıdi aralap júr. Baqylaý kezinde maskúnemder men nashaqorlar jınalatyn prıtondar anyqtaldy.
— Eki páter ıesi baspanasyn nashaqorlar jınalatyn orynǵa aınaldyrǵan. Olarǵa qatysty qylmystyq is qozǵaldy. Prıtondarda jınalyp, esirtki zatyn qoldanǵan 12 nashaqor emdeý mekemesine májbúrli túrde jiberildi. Al 139 adam ishki ister organdarynyń esebine alyndy. Sondaı-aq páterde nemese úıde esirtki zatyn qoldanǵan 224 adam ákimshilik jazaǵa tartyldy, — dep habarlady Aqtóbe oblystyq PD baspasóz qvzmetiniń jetekshisi Erbolat Sarqulov.
Qyrkúıek aıynan beri 44 narkograffıtı anyqtalyp, esirtki zatyn jarnamalaý deregi boıynsha 27 qylmystyq is qozǵady. Qazirgi tańda tergep-tekserý júrip jatyr.
Eske salsaq, Oralda úsh prıtonnyń áreketi áshkerelendi. BQO polıtsııa departamentiniń baspasóz qyzmetinen málim etkenindeı, 51 jastaǵy áıel 2024 jyldyń naýryzynan bıylǵy mamyrǵa deıin qaladaǵy saýnalardyń biriniń aýmaǵynda aqshalaı syıaqyǵa ıntımdik qyzmet kórsetý úshin arnaıy oryn ustaǵan.