Aqtóbede eki qala men 11 aýyl ákimi saılandy

AQTÓBE. KAZINFORM — Aqtóbe oblysynda saılanǵan 13 ákimniń 10-y memlekettik qyzmetshi, ekeýi bıýdjettik sala qyzmetkeri, bireýi ýaqytsha jumyssyz adam. 

Aqtóbe oblysy boıynsha 6 aýdanda saılaý ótti. Alǵa, Áıteke bı, Yrǵyz, Qobda, Muǵaljar, Oıyl aýdandarynda 2 qala jáne 11 aýyldyq okrýg ákimi saılandy. Onyń 9-ynda ókilettilik merzim aıaqtalǵan, 4-inde qyzmettik ókilettilik merziminen buryn toqtatylǵan.

— Saılaýdy ótkizýge 6 aýdandyq, 41 ýchaskelik saılaý komıssııasy jumyldyryldy. 13 saılaý okrýgi boıynsha 45 kandıdat usynyldy. Onyń 9-y (20%) «AMANAT» partııasynan, bireýi (2,2%) «Aýyl» partııasynan, 35-i (77,8%) ózin-ózi usynýshy. Tirkeýge deıin 4 kandıdat óz erkimen aryz jazyp, kandıdatýrasyn qaıtaryp aldy. Saılaýǵa 41 kandıdat qatysty. Saılanǵan ákimderdiń 10-y memlekettik qyzmetshi, ekeýi bıýdjettik sala qyzmetkeri, bireýi ýaqytsha jumyssyz. Saılanǵan ákimderdiń 9-y «AMANAT» saıası partııasynan, bireýi «Aýyl» partııasynan usynyldy. Al úsheýi ózin-ózi usynýshy. Saılanǵan ákimderdiń ortasha jasy — 47 jas. Eń kishisi 34 jasta, eń úlkeni 62 jasta, — dedi Aqtóbe oblystyq saılaý komıssııasy tóraǵasynyń orynbasary Aqmaral Aqmaral Nurmaǵanbetova.

Aıta keteıik, 27 myńǵa jýyq saılaýshynyń 11,3 myńy qatysyp, óz tańdaýyn jasaǵan. Saılaý kúni 62 senimdi ókil, 62 baıqaýshy tirkeldi. Daýys bergender arasynda múgedektigi bar 73 saılaýshy bar.

Eske salsaq, buǵan deıin Aqtóbede aýyl ákimine úmitkerlerdiń basym bóligi ózin-ózi usynýshylar ekeni týraly jazǵan edik. Saılaýda onyń úsheýi kóp daýys jınady.