Aqtóbede eki balasyn tunshyqtyryp óltirgen ananyń isi sotta qarala bastady
AQTÓBE. KAZINFORM — Qazir 29 jastaǵy aıyptalýshy Talǵar psıhologııalyq aýrýhanasynda em alyp jatyr. Al sot-medıtsınalyq saraptama kezinde balalardyń mehanıkalyq asfıksııadan kóz jumǵanyn anyqtady.
Aqtóbe oblystyq qylmystyq ister jónindegi mamandandyrylǵan aýdanaralyq sotynda 29 jastaǵy áıelge qatysty qylmystyq istiń sot aldy tyńdaýy ótti. Іs Qylmystyq kodekstiń 99-baby 3-bóligimen qaralady. Sot aldy tyńdaý kezinde prokýror Eldar Ábıev dármensiz balalardy qasaqana qazaǵa ushyratý oıymen uıyqtap jatqanda jastyqpen tunshyqtyrdy dep málimdedi. Máıitke sot-medıtsınalyq saraptama taǵaıyndalyp, sábılerdiń ólimi mehanıkalyq asfıksııadan bolǵany rastaldy. ıAǵnı tynys alý joldaryna dem jetpeı, qan quıylyp, mert bolǵan. Sot otyrysy kezinde kúıeýi Jeńisbek Ábilhanov BAQ qatysýyna shekteý qoıýdy suraǵanymen, keıin mán-jaıdy tolyq baıandap, suhbat berdi.
— Týǵan apasy týa bitti sal aýrýyna shaldyqqan, anasy qaıtys bolǵan. Ol da múgedek edi. Bárin kúızelispen qabyldaǵan bolýy múmkin. Sodan balalar da sóıleı almaı qalady degen qorqynysh bolǵan. Men solaı esepteımin. Bizdiń otbasy qurǵanymyzǵa 4 jyl boldy. Alǵashynda eshteńe baıqalmady. 11 naýryz kúni saǵat keshki 17:00 shamasynda uıyqtap jattym. Ol maǵan «qyzdy tunshyqtyryp tastadym» dedi. Oıandym, eki balam oınap júr eken. Sengen joqpyn, ári mán bermedim. Keıin syrtqa shyǵyp ketip, oılandym, qoryqtym, qaıtyp keldim. Qyzdyń bir jaq betinde núkteli daqtar qaptap ketken eken. Sodan soń «taıaýda óledi» dedi. Sol kezde «dárigersiń be» dep urystym. Qarap, qoryqtym. Keıin ákesine habar berdim. «Bilem, baıqap júrmin. Emdetýge áreket etkim keledi» dep aıtty. Men soǵan sendim. Oǵan deıin qandaı da bir shara qoldansyn, qoryqsyn degen oımen polıtsııaǵa, medıtsına qyzmetkerlerine aıttym. Ony tekserip, bir táýlikten soń úıge jiberdi. 13 naýryz kúni taǵy qaıtalandy. Sol jaǵdaıdan soń ákesi kelip, alyp ketti. Arada 10 kún ótkennen keıin osyndaı jaǵdaı bolyp tur, — dedi aıyptalýshynyń kúıeýi Jeńisbek Ábilhanov.
Aıyptalýshy 29 jasta. Ol Q.Jubanov atyndaǵy AÓÝ-in bitirgen. Atyraý oblysynyń Saǵyz aýylynda ınformatıka páninen sabaq bergen, sol jerden dekrettik demalysqa shyqqan.
— Eki balanyń árýaǵy úshin emdelip, qoǵamǵa qosylǵanyn qalaımyn. Qazir Talǵarda emdelip jatyr, — dedi Jeńisbek Ábilhanov.
Sot aldy tyńdaý kezinde aıyptalýshynyń qorǵaýshysy medıtsınalyq saraptama qorytyndysyn oqydy.
— Meniń qorǵaýymdaǵy adamǵa psıhoterapevttiń saraptamasy taǵaıyndaldy. Sot psıhologııalyq, sot psıhıatrııalyq saraptamasyna sáıkes qorǵaýymdaǵy aıyptalýshy paranoıdty-shızofrenııa aǵymynyń basqa túrine, depressııaly paranoıdty sındrom túrindegi sozylmaly psıhıkalyq buzylysqa shaldyqqan. Ózine jáne qoǵamǵa qaýipti faktorlar anyqtalady. Saraptama komıssııasy jiti baqylanatyn mamandandyrylǵan úlgidegi psıhıatrııalyq aýrýhanaǵa májbúrli túrde emdeýdi usynyp otyr. ıAǵnı jasaǵan isine jaýap bere almaıtynyn kórsetip otyr, — dedi qorǵaýshy B.Álibaev.
Aıta keteıik, oqıǵa bıyl 23 naýryz kúni Aqtóbe oblysy Muǵaljar aýdany Qandyaǵash qalasynda boldy. 29 jastaǵy áıel 2022 jylǵy uly men 2024 jylǵy qyzyn tunshyqtyryp óltirgen.