Aqtóbede eki balany ıt qaýyp aldy

AQTÓBE. KAZINFORM – Aqtóbede 15 jáne 6 jasar eki balany ıt tistep alyp, olar dáriger kómegine júgindi.

Oqıǵa 4 aqpan kúni keshkilik bolǵan.

Jábirlenýshi jasóspirimniń anasy Dáneker Otarbaevanyń aıtýynsha, uly keshkilik qoqys tógýge shyqqan kezde aýladaǵy balalardy ıt qýyp, tistep jatqanyn kórgen.

Kórshilerin qutqarýǵa júgirgen jasóspirimniń ózin ıt qarsy atylǵan.

— Meniń balam qatty jaraqattandy, eki aıaǵynan tistegen. Polıtsııa qyzmetkerleri kelip, ıttiń fotosyn kórsetti. Atyp tastaǵan eken. Biraq ıesi joq dep aıta almaımyn. Tap-taza, kútim kórgeni kórinip tur. Balam kolledjdiń 1-kýrsynda oqıdy. Ony eresek kórshiler qutqarǵan. Eresekterden ıt qoryqsa da, balalarǵa qarsy umtylǵan. Túnimen mazasyndanyp, qazir qaralyp jatyr. Kún saıyn jaraqatyn tańyp júr, — dedi Dáneker Otarbaeva. 

Ol mektepke baratyn eki qyzyn endi aparyp, úıge qaıta ákelip júr. 

Aqtóbe oblystyq PD baspasóz qyzmetiniń habarlaýynsha, ıt ıesi anyqtalmaǵan, oqıǵaǵa baılanysty veterınar mamandarǵa habar berilgen.

Al oblystyq densaýlyq saqtaý basqarmasynyń habarlaýynsha, 2008 jyly týǵan er balany ıt qapqan kezde jedel járdem qyzmeti shaqyryldy.

Keıin oblystyq balalar aýrýhanasyna jetkizilip, alǵashqy kómek kórsetildi. Qutyrmaǵa qarsy ekpe berilip, úıine jiberildi.

Sonymen birge 6 jastaǵy bala da aýrýhanaǵa jetkizilip, ekpe jasaldy. Ol da emhana dárigerleriniń baqylaýyna alyndy. 

Aıta keteıik, bıyl qańtarda Aqtóbeniń Muǵaljar aýdanynda bir top oqýshyny ıt qýyp, aýlaý jumysy júrgizildi. 

Aqtóbe oblysy boıynsha bıyl buralqy ıtti aýlaý, ýaqytsha ustaý, sterıldeý jumystaryna 201 mln teńgeden astam qarjy qarastyryldy.