Aqtóbede eki aýyldyń ataýy qazaqshalanady

AQTÓBE. KAZINFORM – Aqtóbe oblysynda Pervomaıka jáne Bolgarka aýyldarynyń ataýy qazaqshalanady. Sonymen birge 29 kóshege qaıta ataý beriledi.

Aqtóbe oblysynda byltyr Rodnıkovka jáne Voznesenovka aýyldarynyń ataýyn qazaqshalaý úshin respýblıkalyq onomastıkalyq komıssııaǵa usynys berildi. Rodnıkovka aýyly Bulaqty, Voznesenovka aýyly Aqqudyq bolady. Sonymen birge byltyr ıdeologııalyq turǵydan ataýy eskirgen 3 bilim berý uıymynyń ataýy ózgerdi. Qobda aýdanynda Kalınovka mektebi Besqudyq, Kalınovka aýylyndaǵy bóbekjaı-baqshasy Jeruıyq, Hromtaý aýdanyndaǵy Prostornyı bastaýysh mektebi Jazyq bolyp ózgerdi.

- 2028 jylǵa deıingi jol kartasy bekitildi. Ideologııalyq turǵydan eskirgen eldimekender, onyń quramdas bólikteri qaıta ózgeredi. 2025 jyly Mártók aýdany Pervomaıka aýylyn Birlik, Alǵa aýdany Bolgarka aýylyn Shýaqsaı dep ózgertý josparǵa engizildi. Sonymen birge Aqtóbe qalasy, Shalqar, Muǵaljar, Alǵa aýdandaryndaǵy 29 kósheni qaıta ataý qarastyrylady. Oblysta 61 kóshege ataý berý josparlandy,- dedi Aqtóbe oblystyq tilderdi damytý basqarmasynyń basshysy Amangeldi Qonaqbaev.

Aıta keteıik, Aqtóbede jergilikti atqarýshy organdardaǵy qujat aınalymynyń memlekettik tildegi úlesi 97,5% jetti. Oblystaǵy memlekettik tildi meńgergen eresekterdiń úlesi 86,2%, al tildiń qoǵamda qoldanylýy 82% bolyp tur.

Buǵan deıin habarlaǵanymyzdaı, Oral qalasynda 16 bóbekjaıdyń ataýy qazaqshalandy.