Aqtóbede egin orý naýqany bastaldy

AQTÓBE. KAZINFORM — Qazirgi kezde kúzdik, sonymen birge birer sharýashylyqta jazdyq bıdaıdy orý jumysy júrip jatyr. Óńirdegi qoımalardyń syıymdylyǵy — 685,1 myń tonna. 

Aqtóbe oblysynda bıyl 756 myń gektar jer ıgerildi. Onyń 426 myń gektardan astamy dándi daqyl bolsa, 60,3 myń gektary maıly daqyl. Bıyl astyq jınaý naýqanyna 600 kombaın, 1,5 myń traktor, 800 traktor tirkemesi jumyldyryldy.

— Shildeniń úshinshi onkúndiginen bastap kúzdik daqyldar men ishinara jazdyq daqyldardy jınaý jumystary bastaldy. Qazirgi ýaqytta 20 myń gektardan astam alqaptan 26 myń tonnadan astyq jınaldy. Ortasha ónimdilik gektaryna 13,1 tsentner. Tamyzdyń 20-nan keıin dándi daqyldardy jappaı jınaý bastalady. Aýa raıy qolaıly bolǵan jaǵdaıda naýqan shamamen 20 kúnde aıaqtalmaq, — dep habarlady Aqtóbe oblysy ákiminiń baspasóz qyzmeti.

Oblysta astyq qoımalarynyń syıymdylyǵy 685,1 myń tonna bolyp tur. Bul Aqtóbede jınalatyn astyqty saqtaýǵa jetedi.

— Sharýashylyqtarǵa 7,2 myń tonna arzandatylǵan dızel otyny bólindi. Lıtri — 250 teńge. Bul naryqtyq baǵadan áldeqaıda tómen, — dedi Aqtóbe oblystyq aýyl sharýashylyǵy basqarmasynyń basshysy Asqar Júsibalıev.

Aıtyp óteıik, Aqtóbede bıyl 1,8 mln tonna mal azyǵy daıyndalady. Bul 1 jylǵa arnalǵan mal azyǵy.