Aqtóbede egilgen aǵashtyń 30 paıyzy jersinbedi
AQTÓBE. KAZINFORM — Sońǵy bes jylda oblysta 500 myń túp kóshet egildi. Onyń tek 70 paıyzy ósip shyqty. Endi ár aýdan, aýyl mańynda jasyl beldeý bolýǵa tıis.
Oblysta 2021-2027 jyldar aralyǵynda 35,05 myń gektar jerge 64,7 mln túp orman ekpesin otyrǵyzý josparlandy. Sonyń ishinde byltyr 8 624 ga alqapqa 15,3 mln túp ekpe egildi. Bıyl 3433 gektarǵa 6 mıllıon túpten astam ekpe otyrǵyzylady.
— Oblystyń aýdany — 30 062 000 gektar. Onyń ishinde orman alqaby qorynyń aýdany 254 myń gektardy quraıdy. Onyń tek 64 myń gektarynda ǵana aǵash ósip tur. ıAǵnı 20%-dan astamy. Byltyr ekken 15,3 mln túp kóshettiń shyǵymyn bıyl kóktemde ǵana anyqtaımyz. Shyqpaǵan jeri taǵy tolyqtyrylady, — dedi Aqtóbe oblystyq tabıǵı resýrstar jáne tabıǵatty qorǵaý basqarmasynyń basshysy Isataı Espaǵanbetov.
Sonymen birge oblysta 2021-2025 jyldary aralyǵynda 500 myń túp aǵash otyrǵyzyldy. Onyń ishinde 174 myń túp aǵashty byltyr ekti.
— Shyǵymdylylyǵy bes jylda 70 paıyz shamasynda bolyp tur. Bul tómen dep sanaımyz. Jumys júıeli júrýi kerek. Birinshi — sýarý júıesi. Sonyń ishinde tamshylatyp sýarý júıesi shyǵymdy arttyrady, sý únemdeıdi. Aýdan, aýyl ákimderine uńǵyma qazyp, elektr jelisin júrgizý qajet emes. Rezervýar arqyly tamshylatyp sýarýǵa bolady. Eldimeken, aýdan ortalyǵy, qala aýmaǵyna jasyl beldeý qurý tapsyrmasy bar. Ár aýdanda 10, qalada 15 ga jer jasyl beldeý bolady, — dedi Isataı Espaǵanbetov.
Onyń aıtýynsha, aǵashtyń kóp túri baptasa shyǵymy jaqsy bolady. Qaraǵash túrli pishin jasaýǵa óte yńǵaıly. Byltyr orman jáne tabıǵat qorǵaý mekemeleriniń materıaldyq-tehnıkalyq bazasyn nyǵaıtý úshin jergilikti bıýdjetten 493,2 mln teńge bólindi. Oǵan 19 patrýldik kólik, 4 traktor tirkemesi, 2 qarda júretin kólik, 3 mototsıkl satyp alynǵan. Endi lızıngke órt sóndirý kóligi men traktor satyp alady.
Aıta keteıik, Aqtóbede qum kóshkinin toqtata almaǵan merdigerdiń isi áli sotta qaralyp jatyr. Merdigerler myńdaǵan túp kóshet ekkenimen, sýarý jumystaryna qajetti uńǵyma qazbaǵan. Sóıtip ekpeniń kóbi qýrap ketti, qum kóshkini toqtamady.