Aqtóbede dzıýdodan Qazaqstan chempıonaty ótedi
ASTANA. KAZINFORM - Aqtóbede dzıýdodan erler jáne áıelder arasynda Qazaqstan chempıonaty ótedi.
El birinshligi 15-18 qarasha kúnderi «Qonys» sport kesheninde ótpek. Respýblıkalyq dodaǵa elimizdiń 17 oblysy men Astana, Almaty jáne Shymkent qalalarynan barlyǵy 500-ge jýyq dzıýdoshy qatysady dep josparlanǵan.
Qazaqstan chempıonaty nátıjesinde 2025-2026 jylǵy jańa maýsymǵa ulttyq qurama jasaqtalatyn bolady. Tórt kúnge josparlanǵan jarysta erler men áıelder 7 salmaq dárejesinde ózara myqtyny anyqtaıdy.
Condaı-aq, aralas komandalyq jarystyń jeńimpazyna Qazaqstan kýbogi tabystalady.
Eske salsaq, Astana qalasynda Respýblıka kúnine oraı, qazaq kúresinen «Qazaqstan barysy-2024» respýblıkalyq týrnıri ótedi. Atalǵan iri doda 26 qazan kúni «Barys-Arena» stadıonynda ótedi.
Bul týrnırde oblystyq jarystardyń qorytyndysy boıynsha iriktelgen elimizdiń eń myqty degen 42 balýany baq synaıdy. Olar elimizdiń 17 oblysy men respýblıkalyq mańyzy bar 3 qala - Astana, Almaty jáne Shymkent qalalarynyń sportshylary. Sondaı-aq týrnırge ótken jylǵy «Qazaqstan Barysy» jeńimpazy men «Ásker Barysy» eki balýany qatysady.
