Aqtóbede dúkenge kelýshiler dezınfektsııalyq «dýsh» qabyldaıtyn bolady
AQTÓBE. QazAqparat – Aqtóbede gıpermarketke kelýshiler bastan-aıaq dezınfektsııa jasaıtyn týnnelden ótetin bolady, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Búgin oblys ákimi Ońdasyn Orazalın men qala ákimi Ashat Shaharov qaladaǵy azyq-túlik oryndarynyń jumysymen tanysty.
Jeke kásipker Haıdar Ilıasov aımaq basshysyna óz kúshimen jasaǵan zalalsyzdandyrý týnneliniń jumysyn kórsetti. Arnaıy qurylǵy «Dına» gıpermarketiniń aldyna ornatylǵan. Onyń joǵary jaǵynda suıyqtyq búrkip turady. Kásipkerdiń aıtýynsha, osy arqyly dúkenge kelýshiler dezınfektsııalanady. Ońdasyn Orazalın qala ákimine mundaı jabdyqtar sanyn arttyrýǵa jáne olardy barlyq sýpermarketter men qala bazarlarynyń aldyna ornatýǵa kómek kórsetýdi tapsyrdy.
Málim bolǵandaı, Haıdar Ilıasov bul qurylǵyny Túrkııa ónertapqyshtarynyń tájirıbesi negizinde jasaǵan.
«Shekteýler engizilgenimen, azyq-túlik dúkenderi, dárihana, bankter jumystaryn jalǵastyrady. Aqtóbelikterdiń alańdaýyna esh negiz joq. Azyq-túlik qory jetkilikti», - dedi óńir basshysy O.Orazalın.
Aıta keteıik, áleýmettik jáne otandyq azyq-túliktiń baǵasy turaqty. Al, shetelden keletin ónimderdiń baǵasynda ósim baıqalady. Aımaqtyń azyq-túlik qorynda 3605 tonna kartop, 670 tonna jýa, 970 tonna makoron ónimderi, 892 tonnadan asa qyryqqabat jáne kókónis, jemis-jıdek, un, ósimdik maıy, jumyrtqa bar.
