Aqtóbede dropperlerge qatysty 20-ǵa jýyq is tirkeldi
AQTÓBE. KAZINFROM — Dropperlerdiń kóbi stýdentter, jastar. Qazir Aqtóbede bir qylmystyq is boıynsha úkim shyǵyp, bireýi sotta qaralyp jatyr.
Elimizde bank kartasyn, esepshotyn, ekinshi deńgeıli bank qosymshasyn ýaqytsha qoldanysqa bergen adamdar jaýapqa tartylady. Sonymen birge belgisiz bir nomerden bank kartasyna aqsha tússe, keıin ony ózge esepshotqa jiberýdi suraǵandarǵa kómektesse dropper bolyp tanylýy múmkin.
— Qazirgi kezde Aqtóbe oblysynda 17 qylmystyq is boıynsha tergeý júrip jatyr. Bir is boıynsha úkim shyǵyp, taǵy biri sotqa jetti. Kún saıyn barlyq qylmystyq iske monıtorıng júrgiziledi. Kez kelgen aqsha aýdarymy muqııat tekseriledi. Bank kartasyn, shotyn óz erkimen berdi me degen suraqtyń jaýabyn izdeımiz. Dropper tek ınternet alaıaqtarymen baılanysty qylmys túri emes. Sonymen birge zańsyz esirtki aınalymy kezinde de tirkeledi. Eskirtkini satý kezinde aqshany ózge bir adamnyń atyna aýdarýy múmkin. Kóbine 18-20 jastaǵy jastar osy quryqqa túsip qalady. Olar jeńil tabys tabamyn dep urynyp qalyp júr. Al bul jerde bank kartasyn qoldaný kezinde 20-50 myń teńge usynady, — dedi Aqtóbe oblysy prokýrorynyń kómekshisi Áset Aryqov.
Onyń aıtýynsha, 18-20 jastaǵy stýdentter arasynda jigittermen qatar qyzdar da bar.
— Stýdentter qalaǵa oqýǵa keledi, tez aqsha tabý úshin óz bank kartalaryn satady. Bir adam elimizde 15 shot asha alady. Ár kezde 2-3 shottan satý múmkindigi de bar. Jastar keıin bank esepshoty arqyly qansha aqsha aýdarylyp jatqanyn qaramaıdy. Tek basyna is túskende biledi, — dedi Áset Aryqov.
Aıta keteıik, bıyl Qazaqstanda dropperlikke baılanysty 393 qylmystyq is tirkeldi.
Bul týraly QR Bas prokýratýrasynyń Quqyqtyq statıstıka jáne arnaıy esepke alý komıtetiniń tóraǵasynyń orynbasary Erádil Ahmetov málim etti.
Eske salsaq, Qylmystyq kodekstiń 232-1-baby boıynsha dropperler 7 jylǵa deıin bas bostandyǵynan aıyrylady.
