Aqtóbede Dosjan ıshan meshitin qalpyna keltirý jumystaryna daıyndyq bastaldy
AQTÓBE. QazAqparat - Aqtóbeniń Temir aýdanyndaǵy Dosjan ıshan meshiti qalpyna keltiriledi. Mamandar meshit qurylysy kezinde paıdalanylǵan materıaldardy zerttep jatyr, dep habarlaıdy QazAqparat tilshisi.
Qazaqstannyń kıeli jerler geografııasyna engen Aqtóbedegi 10 nysannyń biri - Dosjan ıshan meshiti. Buǵan deıin tarıhı oryndy saqtap qalýǵa qarjy tapshylyǵy qolbaılaý bolǵanyn jazǵan bolatynbyz. Al bıyl zertteý jumystary bastaldy.
«Qazaqstannyń kıeli jerler geografııasy» jobasy aıasynda oblys aýmaǵyndaǵy «Eskertkishterdi saqtaý jáne qaıta qalpyna keltirý» baǵyty boıynsha birneshe tarıhı-mádenı nysanda restavratsııa-konservatsııa jumystary júrgiziletin bolady. Qazir aýyldyq jerlerge jáne jolǵa jaqyn ornalasqan oblystaǵy úsh eskertkishti qalpyna keltirýge baılanysty jobalyq-smetalyq qujat ázirleý jumystary bastaldy. Solardyń biri - Temir aýdany, Shubarqudyq aýylynan 5 shaqyrym qashyqtyqta ornalasqan HІH ǵasyrdyń sáýlet óneri sanalatyn áıgili Dosjan ıshan meshiti. Atalǵan eskertkishke arheologııalyq qazba jumystaryn Á.Marǵulan atyndaǵy arheologııa ınstıtýty júrgizip jatyr. Maqsaty - meshittiń jan-jaǵyn qazý, tazalaý arqyly konstrýktsııalyq negizin, neden turǵyzylǵanyn, eskertkish deńgeıleriniń ólshemderin jáne qurylys materıalynyń túrin anyqtaý. Qazba-zertteý nátıjesinde jospar syzbalary jasalady. Arheolog-mamandar qazir eskertkish basynda qyzý jumys ústinde. Bizdiń ortalyq tarapynan mamandar tartylǵan«, - dedi Tarıhı-mádenı murany zertteý, qalpyna keltirý jáne qorǵaý ortalyǵynyń bas ınspektory Baqytjan Qalnııaz.
Aıta keteıik, jańa taǵaıyndalǵan oblystyq mádenıet basqarmasynyń basshysy Nurhan Kádirbaev arnaıy baryp, jumys barysymen jaqyn tanysty. Aldaǵy ýaqytta oblystyq bıýdjet esebinen Dosjan ıshan meshiti qaıta qalpyna keltirilýi múmkin.
Úsh nysannyń biri Dosjan ıshan meshiti bolsa, keıingisi Yrǵyz aýdanyndaǵy Almat tamy (XIX ǵasyr), Shalqar aýdanyndaǵy Balǵasyn meshiti (HІІІ-HVIII ǵǵ).
