Aqtóbede Dóń taý-ken baıytý kombınatynyń shahtasynda jumysshysy qaza tapty
AQTÓBE. KAZINFORM — Jumysshy vagondardy tirkeý kezinde jaraqat aldy. Ony Hromtaý aýdandyq aýrýhanasyna jetkizgenimen, aman alyp qalý múmkin bolmady.
Oqıǵa búgin boldy. ERG quramyndaǵy «Qazhrom» kompanııasy Dóń taý-ken baıytý kombınatynyń habarlaýynsha, Qazaqstan Táýelsizdiginiń 10 jyldyǵy atyndaǵy shahtada vagondardy tirkeý jumystary júrgen. Sol kezde taý-ken jumysshysy jaraqat aldy. Zardap shekken qyzmetker Hromtaý aýdandyq aýrýhanasyna jetkizildi.
— Dárigerler qoldan kelgen barlyq sharany jasaǵanymen, qyzmetkerdiń ómirin saqtap qalý múmkin bolmady. Kompanııa qaza bolǵan qyzmetkerlerdiń týǵan-týystary men jaqyndaryna qaıǵyryp kóńil aıtady jáne olarǵa qajetti kómek pen qoldaý kórsetedi. Oqıǵa týraly tıisti memlekettik organdarǵa habarlandy. Arnaıy tergep-tekserý jumystaryn júrgizý úshin Aqtóbe oblysy boıynsha Memlekettik eńbek ınspektsııasy komıtetiniń departamenti ókilderiniń qatysýymen komıssııa quryldy. Qazirgi ýaqytta oqıǵanyń sebepteri men mán-jaıy anyqtalyp jatyr, — dep habarlady Dóń taý-ken baıytý kombınaty resmı paraqsha arqyly.
Aqtóbe oblystyq eńbek ınspektsııasy departamenti aqparat túskenin, komıssııa qurylatynyn málimdedi.
Eske salsaq, 20-qazan kúni dál osy Dóń taý-ken baıytý kombınatynyń «Bolashaq» shahtasynda uńǵylaýshy jaraqat alyp, kóz jumdy. Qazir tergeý júrip jatyr.
