Aqtóbede Dóń ken-baıytý kombınatyndaǵy oqıǵadan soń qylmystyq is qozǵaldy

AQTÓBE. KAZINFORM — «Bolashaq» shahtasyndaǵy oqıǵadan soń Hromtaý aýdandyq polıtsııa bólimi tergeý júrgizip jatyr.

«Bolashaq» shahtasynyń ken óndirý blogynda ot tutanyp, jumysshylar aýrýhanada em qabyldap jatyr. Polıtsııa tergeý jumysyn bastady.

— Hromtaý aýdandyq polıtsııa bólimi sot aldy tergeýdi bastady. Qylmystyq kodekstiń 277-baby 1-bóligi, ıaǵnı, «Taý-ken nemese qurylys jumystaryn júrgizý kezinde qaýipsizdik qaǵıdalaryn buzý» baby boıynsha is qozǵaldy, — dep habarlady oblystyq PD baspasóz qyzmeti.

Buǵan deıin habarlaǵanymyzdaı, Dóń taý-ken baıytý kombınatynyń «Bolashaq» shahtasyndaǵy ken óndirý blogynda elektr jabdyqtaryn montajdap jatqan úsh kezekshi elektroslesardi kúıik shaldy. Eki naýqas aýyr jaǵdaıda jansaqtaý bólimine jetkizilgen. Úshinshi naýqas travmatologııa bóliminde em alyp jatyr. 

Eske salsaq, bıyl aqpan aıynda Hromtaý aýdanyndaǵy dál osy «Bolashaq» shahtasynda qysqa merzimdi tuıyqtalý bolyp, 4 jumysshyny kúıik shaldy. Kóp uzamaı bir jumysshy kóz jumdy.