Aqtóbede dıspanserlik esepte turǵan adamdardyń qarý ustaıtyny belgili boldy
AQTÓBE. QazAqparat – Aqtóbede psıhıatr men narkologtyń esebinde turǵan 49 adam qarý-jaraq ustaýǵa ruqsat alǵan, dep habarlaıdy QazAqparat tilshisi.
Aqtóbe oblystyq prokýratýrasy qarý-jaraqty satyp alý, ruqsat berý zańdylyǵyn tekserdi.
Tekserý nájıjesinde qarý ustaýǵa ruqsaty bar 49 adamnyń túrli kezeńde júıke aýrýyna shaldyqqandardy emdeıtin ortalyqta esepte turǵany anyqtaldy.
Onyń 46-sy narkolog jáne úsheýi psıhıatrdyń tizimine alynǵan.
«Kóbi aldymen qarý-jaraq ustaýǵa ruqsat alyp, keıin dáriger esebine ilikken. Sondyqtan olqylyqty túzetý úshin derekterdi únemi tekserýge, salystyryp otyrýǵa uıǵarym berildi», - dep habarlady prokýror Jasulan Dáýlembev.
Aıta keteıik, óńirde qazir «Qarý» jedel aldyn-alý sharasy ótip jatyr. Polıtsııa qyzmetkerleri zańsyz aınalymnan 45 qarýdy aldy.
«Onyń ishinde úsh oıyq, 37 tegis uńǵyly, bir travmatıkalyq, úsh gazdyq jáne bir elektrli qarý tárkilendi.Sonymen qatar oıyq jáne tegis uńǵyly qarýǵa 47 dana patron alyndy. Adamdardan 219 dana sýyq qarý (pyshaq) tárkilendi. Reıd kezinde 6 myńnan astam atys qarýynyń ıesi tekserildi. Tekserý nátıjesinde 235 ákimshilik quqyq buzýshylyq anyqtaldy. Onyń 37-i qarýdy zańsyz saqtap, 140-y qarýdy saqtaý jáne alyp júrý erejelerin buzǵan», - dedi oblystyq PD baspasóz qyzmetiniń jetekshisi Erbolat Sarqulov.
