Aqtóbede Dımashtyń úlken kontserti ótedi - Berdibek Saparbaev
ASTANA. QazAqparat - Aqtóbe oblysynyń ákimi Berdibek Saparbaev tanymal ánshi Dımash Qudaıbergenniń úlken kontsertin ótkizýdi josparlap júrgenin aıtty, dep xabarlaıdy QazAqparat tilshisi.
«Dımash - bizdiń maqtanyshymyz. Ol Qazaqstannyń atyn álemdik deńgeıde tanytyp júr. Sondyqtan oǵan qoldaý kórsetýimiz kerek. Ózimiz de kómektesip otyramyz. Bıyl Dımashtyń qatysýymen «Baqytty bala» atty úlken kontsert uıymdastyryldy. Óner ortalyǵynda anshlag boldy. Osy jyldy biz «Baqytty balalyq shaq» dep jarııaladyq. Sonyń aıasynda Dımash xalyqaralyq deńgeıde kontsert berdi. Oǵan 24 eldiń ókilderi qatysty. 63 jastaǵy bir áıel sonaý Kishi Azııadan Dımashtyń daýysyn estımin dep, Qazaqstanǵa arnaıy keldi», - dedi B.Saparbaev Astanada ótken baspasóz máslıxatynda.
Oblys basshysynyń aıtýynsha, Dımash Qudaıbergen Aqtóbede jyl saıyn kontsert ótkizýge kelisken.
«Oǵan qosa, kelesi jyly Aqtóbeniń qurylǵanyna 150 jyl tolady. Qazir biz qyzý daıyndalyp jatyrmyz. Árıne, sol kezde Dımashtyń qatysýymen jaqsy bir kontsert uıymdastyramyz. Bálkim, stadıonda, ıa bolmasa, ortalyq alańda úlken bir kontsert ótkizemiz», - dep atap kórsetti Berdibek Mashbekuly.
