Aqtóbede «Dımashtyń Otany» atty týrıstik marshrýt daıyndaldy
AQTÓBE. QazAqparat - Aqtóbe qalasyna Dımash Qudaıbergenniń fantop jetekshileri keledi. Olar úshin «Dımashtyń Otany» týrıstik marshrýty ázirlendi, dep habarlaıdy QazAqparat tilshisi.
Dımash Qudaıbergen týǵan jeri Aqtóbe qalasyna keldi. Al onyń fantop jetekshileri erteń mektep, kolledjdi aralaıdy. Buǵan deıin habarlaǵanymyzdaı, Qytaı, AQSh, Germanııa, Malaızııa, Japonııa, Polsha, Frantsııa, Fınlıandııa, Jańa Zelandııa, Reseı, Ýkraınadan fantop jetekshilerin «Qazaq týrızm» ulttyq kompanııasy kútip alady. Aqtóbe oblysynyń syrtqy baılanystar jáne týrızm basqarmasy men «Kazakh Tourism» UK» AQ-y birigip, «Dımash Týr» jobasy aıasynda «Dımashtyń Otany» atty týrıstik marshrýtty iske qosty. Maqsat - Qazaqstannyń týrıstik áleýetin nasıhattaý jáne Dımash Qudaıbergenniń Otanymen tanystyrý.
«Barlyǵy 7 kúnge josparlanǵan. Erteń bastalyp, 6 maýsymǵa deıin jalǵasady. Dımashtyń Qytaı, AQSh, Germanııa, Malaızııa, Japonııa, Polsha, Frantsııa, Fınlıandııa, Jańa Zelandııa, Reseı, Ýkraına elderindegi jáne Qazaqstandaǵy jankúıer top jetekshileri kelip, alǵashqy kúnderin Aqtóbede ótkizedi. Barlyǵy 25 adam. Olar qalanyń kórikti jerleri men týrıstik nysandaryn aralap, Dımash Qudaıbergen oqyǵan mektep pen kolledjge, «Bagytty bala-2018» birinshi ashyq balalar baıqaýyna barady. Sonymen qatar, Dımash Qudaıbergenge vokaldan sabaq bergen ustazy, QR eńbek sińirgen óner qaıratkeri Marat Áıtimovtiń sheberlik sabaǵyna qatysady. Ári Dımashtyń ata-ájesimen, otbasymen kezdesedi», - dep habarlady uıymdastyrýshylar.
Aıta keteıik, fantop jetekshileri mektepte Dımash Qudaıbergenniń oqý úlgerimi tabelin kórip, bilim alǵan synybynda bolady. Muǵalimderimen tildesip, ánshi týraly jan-jaqty aqparat ala alady. Ári ata-ájesimen, anasy Sveta Aıtbaevamen kezdesý, áńgimelesý qarastyrylǵan. Jospar boıynsha otandyq týroperatorlar Dımashtyń búkil álemdegi jankúıerleri úshin turaqty túrde týr uıymdastyratyn bolady.
