Aqtóbede Dımash Qudaıbergen beınelengen kartına satylymǵa qoıyldy
Aqtóbe oblysynyń kásipkerleri búgin úlken qaıyrymdylyq balyn ótkizip, múmkindigi shekteýli jandar men olardyń ata-analaryna arnaıy sertıfıkat tabys etti. Shara «Atameken» kásipkerler palatasyndaǵy Іsker áıelder keńesiniń bastamasymen jáne Aqtóbe qalasy ákimdiginiń qoldaýymen uıymdastyryldy. Qaıyrymdylyq keshke memlekettik organdardyń, bıznestiń, úkimettik emes uıym ókilderi men depýtattar shaqyryldy. Aqtóbe oblysynyń ákimi Berdibek Saparbaev pen QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev ta qatysty
«Kómek berý, qoldaý kórsetý qazaqqa tán qasıet. Bizdiń osy ereksheligimiz kópke úlgi. Ózge ult ókilderi de qazaqtyń qaıyrymdy isterin úlgi etip, syılaıdy. Aqtóbe kásipkerlerine alǵys aıtamyz. Bul kesh Jańa jyl merekesi qarsańynda uıymdastyrylyp, adamdarǵa erekshe kóńil-kúı syılaıtynyna senimdimiz», - dedi oblys ákimi Berdibek Saparbaev.
Aıta keteıik, qaıyrymdylyq bal kezinde bes otbasynyń árqaısysyna 500 myń teńgeniń sertıfıkaty tapsyryldy. Birinshi sertıfıkat І top múgedegi Sergeı Ostrovskııge berildi. Ol «Damý-Kómek» baǵdarlamasy arqyly kompıýter men keńse jıhazdaryn alyp, zaǵıp jáne kórý qabileti nashar adamdardy kompıýterlik saýattylyqqa úıretý klasyn ashty. Qazirgi kezde kásipker turaqty ǵımarat tappaı, óz járdemaqysyn keńse jaldaýǵa tólep otyr. Aldaǵy ýaqytta óńirlik kásipkerler palatasyndaǵy Іsker áıelder keńesi Sergeı Ostrovskııdiń memlekettik satyp alýlar men konkýrstarǵa qatysýy úshin quqyqtyq mártebe alýǵa, qoǵamdyq birlestik qurýyna qoldaý jasamaq.
Ekinshisi - 26 jastaǵy Ámirshe Orynbasarov. ІІ top múgedegi kásipkerlik negizderi boıynsha bilim alyp, er adamdarǵa arnalǵan shashtaraz ashý bıznes-jobasyn qorǵap shyqty. Nátıjeli jumyspen qamtýdy jáne jappaı kásipkerlikti damytýdyń baǵdarlamasy arqyly 240 myń teńge kóleminde qaıtarymsyz grant utyp aldy. Búgin berilgen qarjy qosymsha jabdyqtar satyp alýǵa jáne keńseni jalǵa alý úshin jumsalady.
Úshinshisi - Іzmurat Súgirtaev. І top múgedegi jolaýshylar tasymalymen aınalysyp, qurylys jumystaryn júrgizýge, páter jóndeýge múmkindik aldy.
Tórtinshisi - Eset jáne Beket atty týa bitti sal aýrýna shaldyqqan eki balanyń anasy Janna Kalına. Ol úıinde otyryp tort, kondıtelik buıymdar pisiredi. Qarjy balalardyń múgedektik arbasyn jańartýǵa qajet boldy.
Besinshisi - Gúlnur Dosmuhambetova. Qarjy aq qan aýrýyna shaldyqqan tórt jastaǵy Aqjan Ákimǵalıdiń emine jumsalady.
Qaıyrymdylyq baly kezinde kirý bıletteri satylyp, túrli kartınalar, aspazdyq stýdııalary men ásemdik salondarynyń, kıim dúkenderiniń jáne kosmetıka buıymdary ortalyqtarynyń sertıfıkattary aýktsıonǵa qoıyldy. Eń qymbaty ánshi Dımash Qudaıbergenniń kartınasy boldy. Kartına baǵasy 100 myń teńgeden bastalyp, 200 myń teńgege jetti. Aqtóbelik kásipker, depýtat Ashat Aıtjanov satyp alyp, óz lebizin bildirdi.
«Dımash Qudaıbergen qazaqtyń atyn álemge tanytyp júrgen ánshi ári jerlesimiz. Al anasy Sveta Aıtbaeva bizdiń áriptesimiz. Qazaqtyń balalary osyndaı bolsyn», - dedi kásipker.
Dımash Qudaıbergenniń «Dala juldyzy» atty kartınasyn aqtóbelik sýretshi Aıdar Espaev maıly boıaýmen salǵan.
Aıta keteıik, shara QR Ulttyq kásipkerler palatasynyń bastamasymen júzege asyrylǵan «Atamekenim» aktsııasy aıasynda uıymdastyryldy.