Aqtóbede depýtattar áıelder men balalardyń quqyǵyn qorǵaýǵa qatysty normalardy túsindirdi
AQTÓBE. KAZINFORM - Májilis tóraǵasynyń orynbasary Danııa Espaeva men Májilis depýtaty Juldyz Súleımenova Aqtóbe oblysynyń áıel-depýtattarymen jáne áıelder qaýymymen kezdesti. Otyrysta sońǵy zańnamalyq ózgerister talqylandy.
Danııa Espaeva ótken sessııada Májilis áıelder men balalardy áleýmettik, ekonomıkalyq jáne quqyqtyq qorǵaýǵa baǵyttalǵan birqatar zań qabyldaǵanyn aıtty. Eń negizgileri – turmystyq zorlyq-zombylyq pen balalarǵa qarsy qylmyspen kúresýge qatysty túzetýler, kredıt berý kezindegi qaterlerdi azaıtý jáne qaryz alýshylardyń quqyǵyn qorǵaýǵa baǵyttalǵan túzetýler men «Ulttyq qor balalarǵa» zańy.
Májilis depýtaty Juldyz Súleımenova elimizde áıelder quqyǵyn qorǵaý sharalary tek osy zańmen shektelmeıtinin atap ótti. Aldaǵy ýaqytta eńbek kodeksine qýdalaý uǵymyn engizý josparlanyp otyr. Jynystyq qýdalaýǵa qatysty jaýapkershilik te qarastyrylady. Sondaı-aq depýtat alıment óndirýge kómektesý sharalary qarastyrylyp jatqanyn aıtty.
«Qazir bizde eki sheshim bar. Onyń birinshisi – alıment tólemeı júrgen azamattar úshin jumys berýshilerdiń jaýapkershiligin qarastyrý. Al ekinshisi – jalpy alıment tóleý jónindegi memlekettik qor qurý», – dedi Juldyz Súleımenova.
Jıynda Aqtóbe oblysynda belsendi áıelderdiń róli artyp kele jatqany aıtyldy. Qazirgi tańda oblysta kompanııalardy basqaratyn áıelderdiń úlesi 51,1 paıyzǵa jetken. Jalpy oblys boıynsha kásipkerlerdiń 56,5 paıyzy – áıelder. Basshy áıelderdiń basym bóligi, ıaǵnı 70 paıyzdan astamy bilim berý salasynda jumys isteıdi. Oblystyń barlyq deńgeıdegi máslıhatyndaǵy 205 mandattyń 46-sy nemese 22,8 paıyzy áıelder.
Jıynǵa qatysýshylar bilim berý uıymdaryna lıtsenzııa berý, genderlik teńdikti qoldaý, ajyrasý kezinde múlikti bólý, mektep oqýshylary arasyndaǵy buzaqylyq, balabaqshadaǵy maman tapshylyǵyna qatysty jáne basqa da máselelerdi kóterdi.
