Aqtóbede densaýlyq saqtaý basqarmasynyń basshysy qyzmettik kóligin Qarttar úıine tapsyrdy
AQTÓBE. QazAqparat – Aqtóbe oblystyq densaýlyq saqtaý basqarmasynyń basshysy Rústem Isaev qyzmettik kóliginen bas tartyp, qarttar úıiniń ıgiligine berdi, dep habarlaıdy QazAqparat tilshisi.
«Prezıdent Qasym-Jomart Toqaev 26 qańtar kúni qyzmettik kólikti qysqartýǵa tapsyrma berdi. Kóliktiń kútimi, janar-jaǵarmaıyna kóp qarjy jumsalady. Ózim sheshim qabyldap, «Aqtóbe – adaldyq alańy» jobalyq keńsesine habarladym. Meniń oıymsha, indet kezinde kólikke minip, el arasynan alshaq júretin shaq emes. Kólik júrgizýshimdi jumystan bosatyp, 2018 jyly shyqqan jańa qyzmettik kóligimdi qattar úıine tapsyryp otyrmyn. Kólik markasy - «Toyota Camry 50». Jaǵdaıy óte jaqsy. Jasy 60-tan asqan adamdar qazir kóshede kóp júrmeýi, adam kóp shoǵarlanatyn oryndarǵa barmaýy tıis. Olardy ýaqytyly emhana, aýrýhanaǵa da aparý kerek», - dedi Rústem Isaev. Ol endi jumysqa jaıaý baratyn boldy.
«Birinshiden, ózim jeke kóligimmen júremin. Ekinshiden, jumys ornym men úı arasy jaqyn. Kúnde tańerteń jaıaý kelip, úıge jaıaý baramyn. Taza aýa paıdaly. Ózimniń úsh orynbasarym bar. Úsheýi de óz kóligimen júr. Eshkimnen kem emes, memleketke shyǵyn keltirmeıdi», - deıdi R.Isaev.
«Qarttar úıinde 3 kólik bar. Naýqas jandardy aýrýhanaǵa, emhanaǵa aparý úshin ÝAZ kóligin paıdalanamyz. Egde jastaǵy qarııalar úshin minip-túsý qıyn. Jeńil kólikti bizge bergenine óte qýanyshtymyz», - dedi Qarttar úıi dırektorynyń emdeý isi jónindegi meńgerýshisi Gúlmıra Nurtazına.
