Aqtóbede densaýlyǵy syr bergen qarııaǵa kómektesý úshin qutqarýshylar 18 shaqyrym jaıaý júrdi
AQTÓBE. KAZINFORM – Aqtóbede Muǵaljar aýdanyndaǵy tótenshe jaǵdaılar bóliminiń 8 qyzmetkeri qarııaǵa kómektesý úshin kóliktiń aldyna túsip júgirdi. Olar 18 shaqyrym qashyqta ornalasqan aýylǵa jaıaý bardy.
Aqtóbe oblysynda borandy kúni shaqyrtýǵa jaıaý barǵan tótenshe jaǵdaılar bólimi qyzmetkerleriniń aty-jóni túgel belgili boldy: Muǵaljar aýdany №8 órt sóndirý ólimshe komandıri N. Tájiǵulov, bólimshe komandıri D. Shamakov, qaraýyl bastyǵy A. Álı, órt sóndirýshiler E. Marat, A. Qusaıynov jáne J. Sultamuratov, A. Saǵyndyq, A.Jalǵasov. Olar keshe Qandyaǵash qalasynan Basshıli aýylyna jaıaý bardy. 18 shaqyrym qashyqtyqta ornalasqan aýylda qarııanyń densaýlyǵy syr berip, kómek suraǵan soń shuǵyl jolǵa shyqqan.
— 7 aqpan kúni saǵat 8:00 shamasynda Muǵaljar aýdany Qandyaǵash qalasy órt sóndirý bóliminiń 112 telefon nómirine Basshıli aýylynan kómek surap habarlasady. 75 jastaǵy áje aýyryp, Qandyaǵash qalasyna jetkizý kerek boldy. Habarlama alǵan boıda órt sóndirý bóliminen «Trekol» jol talǵamaıtyn avtokóligi shyǵady. Onda 6 qutqarýshy otyrdyq. Basshıli aýyly Qandyaǵash qalasynan 18 shaqyrym jerde ornalasqan. Keshe aýa raıyna baılanysty joldyń kórinýi nashar boldy. Biz 2-3 qutqarýshy bolyp jaıaý júrip, «Trekolǵa» joldy kórsetip otyrdyq. Sol aýylǵa 18 shaqyrym júrip baryp, júrip keri qaıttyq. Árbir 1-1,5 shaqyrym saıyn aýysyp otyrdyq. Ózim 3 jyldan beri órt sóndirý bóliminde jumys istep jatyrmyn. Mundaı jaǵdaı bizde bolmady, — deıdi qaraýyl bastyǵy Aqdáýlet Álı.
Aqtóbe oblystyq TJD bastyǵy Nurǵalı Jýnýsovtiń aıtýynsha, óńirde 10 «Trekol» jol talǵamaıtyn kóligi bar. Bul jetkilikti.
— Qazir habar-osharsyz ketken eshkim joq. Bári tabyldy. Biraq áli de shaqyrý túsip jatyr. Qobda aýdanynda densaýlyǵyna baılanysty shaqyrtý boldy búgin. Áıeldi Aqtóbe qalasynyń aýrýhanasyna jetkizý úshin aýdandyq TJB tapsyrma berildi. Jalpy jolda qalǵan kólikter men júrgizýshilerge qandaı kómek kerek ekenin bildik. Janar-jaǵarmaı qajet bolsa, jergilikti atqarýshy organmen birge qamtamasyz etip jatyrmyz, — dedi Aqtóbe oblystyq TJD bastyǵy Nurǵalı Júnisov.
