Aqtóbede denesi ózennen tabylǵan oqýshynyń anasy tergeýdiń ádil ótýin surady
AQTÓBE. KAZINFORM – Oqýshy Islam Tóreǵalıdiń anasy Aıgúl Kereeva, onyń janyn tabylǵan 27 jastaǵy aqtóbelik Syrlybaı Samattyń ákesi Samat Qalıev ekeýiniń de óz-ózine qol jumsaǵanyna senbeıdi. Búgin olar tilshilerge suhbat berdi.
Aqtóbe qalasy Keńes Nokın dańǵyly boıynda ornalasqan monshada barmen kómekshisi bolǵan oqýshy sol kúni jumystan kesh shyqqan. Monsha ákimshisi Gúlzat Tátenovanyń aıtýynsha, ol mysyǵyna tamaq salyp alý úshin dorba izdep, biraz ýaqyt ishte júrgen.
- Ol bala bizde qosymsha tabys tapty. Ákesi monshaǵa kelip, túsip turady. Balasyn jumysqa alýdy surap, ózi qolhat jazyp ta berdi. Senbi, jeksenbi kúni saǵat 15:00- den keıin kelip, keshki 22:30-ǵa deıin ǵana jumys isteıdi. Sol kúni de ádettegideı ýaqytta keldi. Esh ózgeris bolmady. Tek ádettegiden kesh shyqty. Úıi jaqyn mańda, ózi jaıaý barady. Túnde ákesi habarlasty, tańda monsha ıesi men ákesi izdedi, keıin kólikti tapqan, - dedi ol.
Oqýshy Islam Tóreǵalıdi otbasy Atyraý oblysy Qulsary qalasyna aparyp jerledi. Otbasy osydan 8 jyl buryn Aqtóbege qonys aýdarǵan. 30 qarasha kúni monsha ákimshiligi qońyraý shalyp, ony shuǵyl jumysqa shaqyrady. Sol kúni jumysta bolyp, túnde úıine qaraı shyqqan. Monsha janynda turǵan kólik oqýshy burylysqa jetkende qozǵalyp, ony mingizip alady. Otbasy balany saǵat túngi 03:00-den bastap izdep, monsha ıesine qońyraý shalady. Tańda monsha ıesimen kezdesip, beınebaqylaý kamerasyn qaraǵan. Esh izin tappaǵan soń polıtsııaǵa habar berip, aryz da jazady. Tústen keıin taǵy kamerany qaraǵanda monsha ıesi kólikti buǵan deıin ózen jaǵasynan kórgenin aıtqan.
- Kameradan qaraǵan kezde balam kóliktiń aldyna otyrǵan. Al kólik tabylǵanda telefony kóliktiń artynda jatyr eken. Ózen jaǵasynan tabylǵanda kóliktiń esikteri ashyq tur. Balamdy ne úshin qorlady? Ne úshin óltirdi? Maǵan ádildik kerek. Balamdy eshkim qaıtaryp bere almaıdy. Ony jaqsy bilemin. Deıturǵanmen balamnyń kisi qolynan qaza tapqanyn dáleldeýim kerek bolyp tur. Ómirge qushtarlyǵy óte joǵary bala. Mektepte jaqsy oqydy. Óz-ózine qol jumsap, óz-ózin qurban qyldy dep aıta almaımyn, - dedi Islam Tóreǵalıetiń anasy Aıgúl Kereeva.
Balasynyń murnynda, qulaq tusynda jáne denesi men aıaǵynda soqqy izi bar ekenin kórip, kúdik kúsheıe túsken. Ári ekeýi bir-birin tanıdy degenge senbeıdi.
- Kináli adamdy taýyp, sonyń jazasyn berse eken deımin. Balamnyń jany tynysh bolýy úshin ony qorlaǵan adamdar jazasyn alsyn, - dedi A.Kereeva.
Kólik júrgizýshisi Syrlybaı Samattyń ákesi Samat Qalıev te balasy oqýshyny tanymaıdy dep otyr. 30 qarasha kúni saǵat 22:30-da otbasymen birge otyryp keshki as ishken, saǵat 23:00-ge deıin úıinde bolǵan. Ári qaraı habarsyz ketken soń otbasy izdep, jan-jaqtan qońyraý soǵady. Biraq jaýap bolmaı, 1 jeltoqsan kúni tústen keıin polıtsııa kóliktiń fotosyn kórsetip, ózen jaǵasyna ákeledi.
- Tergeý júrip jatyr. Polıtsııa «ekeýi de sýǵa ketken» deıdi. Balamnyń denesinen zorlyq-zombylyq belgisin kórgenim joq. Degenmen bir kúdik bar bizde. Buryn-sońdy bir-birin tanymaıtyn balalar. Eki jaqtyń ata-anasy da bir-birin, kólikti de kórmegen. Ne aıtarymyzdy bilmeımiz. Ulym jumys isteıdi, úılenbedi. Balabaqshada operator boldy. Erteńine jumysqa barýy kerek edi. Ashyqtyqty talap etemiz, ádil sheshim shyqsa eken deımiz. Qazir alyp-qashpa sóz de kóp. «Eki bala bir-birimen jaǵalasty, keıin bir-birimen kelispeýshilik boldy» deıdi. Biraq eki bala bir-birin tanymasa, bir-birin kórmese, qalaı bir-birimen janjaldasady. Artynda bireý bar nemese birdeńeniń ústine tap boldy, - dedi Samat Qalıeva.
Aqtóbe oblystyq polıtsııa departamenti baspasóz qyzmetiniń habarlaýynsha, oqýshynyń otbasy taratqan beınejazba tekserildi. Keıin kólik tabylyp, ekeýiniń denesi sýdan shyǵaryldy. Áleýmettik jelidegi beınejazbaǵa qatysty da túsinik berdi.
- Aldyn ala málimet boıynsha, onyń denesinen zorlyq-zombylyq belgileri anyqtalǵan joq. Oqıǵanyń barlyq mán-jaıyn anyqtaý úshin tergeý amaldary júrgizilip jatyr. Ekeýi tanys, - dep habarlady Aqtóbe oblystyq polıtsııa departamenti baspasóz qyzmeti.
Eske salsaq, Aqtóbede joǵalǵan oqýshynyń denesi 1 jeltoqsan, al 27 jastaǵy aqtóbeliktiń denesi 2 jeltoqsan kúni ózennen tabyldy. Oqýshy da, onyń janynda bolǵan Syrlabaı Samat ta 30 qarasha kúni ketip, úıine qaıta oralmaǵan. Olardyń denesin súńgýirler ózennen tapty.