Aqtóbede denesi ózennen tabylǵan oqýshy men er adamnyń isi qysqartyldy
AQTÓBE. KAZINFORM – Oqýshy Islam Tóreǵalı men 27 jastaǵy aqtóbelik Syrlybaı Samattyń ólimine qatysty is boıynsha tergeý aıaqtaldy. Bul týraly Aqtóbe oblystyq PD baspasóz qyzmeti habarlady.
Islam Tóreǵalı men 27 jastaǵy aqtóbelik Syrlybaı Samat byltyr qarasha aıynyń 30-y kúni joǵalyp, arada eki kún ótkennen keıin deneleri ózennen shyǵaryldy. Іzdestirý jumystary kezinde ekeýiniń de uıaly telefony tabyldy. Polıtsııa qyzmetkerleri sol kezde olardyń denesinde qandaı da bir zorlyq-zombylyq belgisi anyqtalmaǵanyn jetkizdi.
- Іs qysqartyldy, qylmys quramy joq, - dep qysqa qaıyrdy Aqtóbe oblystyq PD baspasóz qyzmeti.
Aıta keteıik, eki otbasynyń ata-anasy ol kezde «qupııa ólimniń sebebi bolýy» kerek dep tergeýdiń ádil ótýin surady. Sebebi monshada jumys istep júrgen oqýshy úıine qaraı buryla bergende belgisiz bir kólik onyń sońyna ilesken. Beınebaqylaý kamerasyna túsip qalǵan bul vıdeony polıtsııa da qarap shyqty.
