Aqtóbede demalys kúnderi shekteý kúsheıtiledi
AQTÓBE. QazAqparat – Aqtóbe oblysynda shekteý sharasy kúsheıtiledi. Senbi, jeksenbi kúnderi sebepsiz dalaǵa shyǵýǵa bolmaıdy, dep habarlaıdy QazAqparat tilshisi.
26 maýsym kúni saǵat 22:00-den bastap 29 maýsym kúngi saǵat 00:00-ge deıin jáne odan keıin epıdemıologııalyq jaǵdaı turaqtanǵanǵa deıin árbir demalys kúnderi shekteý jáne karantın sharalary ýaqytsha kúsheıtiledi.
«Aqtóbe qalasy boıynsha jaıaý jáne jeke kólikpen júrýge tyıym salynsyn. Tek turǵylyqty jerinen jumys ornyna deıin jáne keri qaıtýǵa bolady. Ol úshin jumys ornynan anyqtama bolýy tıis. Azyq-túlik taýarlaryn, dári-dármek preparattaryn jáne medıtsınalyq buıymdardy alýǵa barýǵa bolady. Úı janýarlaryn turǵylyqty jerine jaqyn jerde ǵana serýendetý mindet», - dedi oblystyq taýarlar men kórsetiletin qyzmetter sapasy men qaýipsizdigin baqylaý departamentiniń basshysy Nursulý Berkimbaeva.
Onyń aıtýynsha, 65 jastan asqan adamdar asa qajet bolmasa, kóshege shyqpaýy tıis. Ári saýda ortalyqtarynda, bazarlarda, qoǵamdyq kólikterde, azyq-túlik jáne turmystyq dúkenderinde, qyzmet kórsetý oryndarynda jáne kópshilik jınalatyn oryndarda dezınfektsııalyq sharalar kúsheıtiledi.
Aıta keteıik, sońǵy táýlikte óńirde 22 adam aýyryp, ınfektsııalyq gospıtalǵa jatqyzyldy. Ósim 3 paıyzdan asty. Bireýi Mańǵystaý oblysynyń týmasy. Baıǵanınnen 3, Shalqardan 1 adam anyqtaldy. Ózgesi Aqtóbe qalasynyń turǵyny.
Іndet juqtyrǵandardyń kóbi jedel respıratorlyq vırýstyq ınfektsııa sımptomdarymen dáriger kómegine júgingen. Arasynda 1 jasar bala bar. Oblysta barlyǵy 693 adam dertke shaldyqsa, onyń teń jartysynan astamy emdelip shyqqan.
Al eshqandaı klınıkalyq belgisi baıqalmaıtyndar qatary 433-ke jetti. Bir táýlikte oblysta 44 tasymaldaýshy tirkeldi.
