Aqtóbede demalýshylar sýǵa aǵyp bara jatqan balalardy qutqardy
AQTÓBE. QazAqparat - Aqtóbede demalys kúni Aqtóbe sý qoımasyndaǵy jeke jaǵajaıda jasóspirim qyz sýǵa ketti, dep habarlaıdy QazAqparat tilshisi.
Qaıǵyly oqıǵa 29 shildede keshkisin «Alaý» jeke jaǵajaıynda bolǵan. Úsh bala sýǵa aǵyp bara jatqan. Demalýshylar olardyń tek ekeýin qutqaryp qalǵan, alaıda 14 jastaǵy qyz sýǵa batyp ketken.
«Qaıǵyly oqıǵa 29 shildede «Alaý» jaǵajaıynda bolǵan. Jedel-qutqarý jasaǵy men bir tehnıka birligi 14 jasar qyzdyń denesin tapty. Ol 18:44-te shomylýǵa arnalmaǵan jerde sýǵa batyp ketken», - dep habarlady oblystyq TJD-nyń baspasóz hatshysy Aqtilek Keńes.
Budan buryn habarlanǵandaı, shildede Aqtóbe sý qoımasyndaǵy «Іnjý» jeke jaǵajaıynda qum opyrylǵan edi. Sonyń saldarynan eki búldirshin zardap shekti. 10 aılyq sábı túrli jaraqatpen jansaqtaý bólimine tústi.
