Aqtóbede deldaldar poıyzǵa bılet satyp júr

AQTÓBE. QazAqparat - Aqtóbede poıyzǵa bılet joq, al deldaldar 4 myń teńgeniń bıletin satyp alý úshin 8 myń teńge suraıdy, dep habarlaıdy QazAqparat tilshisi.

«Aqtóbe - adaldyq alańy» jobalyq keńsesiniń saraptamalyq músheleri jolaýshylar tasymaly salasyn tekserdi. «Adal jol» jobasy aıasynda monıtorıng júrgizildi.

«Monıtorıng Aqtóbe temirjol vokzalynan bastaldy. Munda avtoturaq aqyly. 15 mınýt tegin bolǵanymen, kólik kirgen kezde talonǵa ýaqyty jazylmaıdy. Sondyqtan kólik ıeleri 15 mınýt kidirmegenin dáleldeı almaıdy. Qoǵam ókilderi «jasyryn satyp alýshy» ádisimen temirjol kassalaryna da bardy. Onda bılet bolmady, keıin deldal óz qyzmeti úshin 8 myń teńge surady. ıAǵnı, 4 myń teńgeniń bıletin alý úshin taǵy 8 myń teńge tóleý kerek», - dedi «Aqtóbe - adaldyq alańy» jobalyq keńsesiniń baspasóz qyzmeti.

Aıta keteıik, tekserý kezinde «Almaty-Oral» baǵyty boıynsha Alǵa stantsııasynan Aqtóbe qalasyna deıin jáne «Aqtóbe-Atyraý» baǵyty boıynsha Alǵa stantsııasynan Aqkemer stantsııasyna deıin bir adam úshin 500 teńge kóleminde syıaqy tólep, bıletsiz júrýge bolatyny anyqtaldy. Jolserikterdiń isi de quzyrly organdarǵa tapsyryldy. Materıaldar zerdelenip jatyr.