Aqtóbede daýyldan keıingi aýyldyń qazirgi kúıi kórsetildi

Baıǵanın aýdany ortalyǵyndaǵy Qaraýylkeldi aýylynda qatty daýyl men nóser jaýynnan sport kesheniniń qabyrǵasy ushyp, ortalyq meshittiń shatyryna zaqym keldi. Sonymen birge 6 dúken de búlindi. Qazirgi kezde qansha úıdiń shatyry ushqany áli belgisiz kúıinde qalyp otyr. Sonymen birge qora, saraı men sharbaq da ushyp, qulap qalǵan.

- Evakýatsııalyq pýnktke keldik. Munda 7 adam bar. Qoldaý bolady, búkil shyǵyn óteledi. Arnaıy komıssııa kelip, shtab quryldy. Eń bastysy biz úshin – halyqtyń amandyǵy, densaýlyǵy. Turǵyndar aýyzbirshiligin kórsetip, bir-birin qoldap jatyr,- dedi Aqtóbe oblysy ákiminiń orynbasary Ǵalymjan Eleýov.

Baıǵanın aýdanynyń ákimi Aıbek Kópenovtiń aıtýynsha, sý jáne elektr jelisin iske qosý jumystary áli de júrgizilip jatyr.

- Qaraýylkeldi aýylynda bolǵan qatty daýyl men nóserdiń saldarynan birqatar ǵımarat zardap shekti. Onyń ishinde ákimshilik ǵımarattar, bıznes sýbektileriniń nysany jáne jeke turǵyn úıler bar. Arnaıy komıssııa zardap shekken úıler men kásipkerlerdiń shyǵynyn anyqtap jatyr. Oblys ákiminiń tapsyrmasyna saı barlyq kommýnaldyq qyzmet aýdanǵa kelip, jumys isteýde,- dedi ol.

Al turǵyndar bolsa aıaq astynan daýyl kóterilip, áp sátte bárin ushyryp áketkenin aıtty.

- Men shaǵyn ǵana úıde otyrdym. Ol qulap qaldy. Qora da qulady. Jańbyr saǵat 16:00-den bastap jaýdy. Mundaıdy kórgende qatty qorqyp kettim. Qazir úısiz qalyp otyrmyn. Qazir adamdar kómektesip jatyr,- dedi aýyl turǵyny Aqmaral Dúkenova.

Eske salsaq, keshe Aqtóbede qatty daýyl kezinde munara qulap, úsh adam zardap shekti.

Daýyl kezinde zardap shekken júkti áıel jansaqtaý bóliminde jatyr.