Aqtóbede daýyldan keıin jaryqsyz qalǵan aýylǵa birneshe aýdannan arnaıy top bardy
AQTÓBE. KAZINFORM – Aýdanda qurylǵan Call ortalyqqa 50-den astam qońyraý tústi. Qazirgi kezde aýylda sý, baılanys bar. Jaryqty kezeń-kezeńimen iske qosyp jatyr.
Baıǵanın aýdanynyń ortalyǵy Qaraýylkeldide jaryq keshe keshkilik óship, búgin ǵana kezeń-kezeńimen iske qosylyp jatyr. Sebebi qatty daýyl kezinde elektr symy úzilip qaldy. «Energosıstema» JShS kúsheıtilgen jumys rejımine kóship, jedel shtab quryldy.
- Áýe jelilerinde kóptegen zaqym anyqtaldy. Elektrmen jabdyqtaýdy jedel qalpyna keltirý úshin Baıǵanınge Muǵaljar, Temir aýdandarynan, sondaı-aq Aqtóbe qalasyndaǵy joǵary kerneýli elektr jelileri, Qosalqy stantsııalar qyzmetterinen mamandar men arnaıy tehnıka jiberildi. Qalpyna keltirý jumystaryna qolaısyz aýa raıy men turaqty baılanystyń bolmaýy keri áserin tıgizip otyr. Shalǵaı nysandarmen baılanys «Týraıa» spýtnıktik jáne «Beeline» uıaly baılanysy arqyly júrgizildi. Túngi ýaqytta júrgizilgen jedel jumystardyń nátıjesinde Qaraýylkeldi aýylynda elektrmen jabdyqtaý ishinara qalpyna keltirildi. «Energosıstema» JShS mamandary jumysty úzdiksiz jalǵastyryp, nysandardy kezeń-kezeńimen elektr jelisine qosady. Elektrmen jabdyqtaýdy tolyq qalpyna keltirý shamamen saǵat 20:00-de aıaqtalady,- dep habarlady «Energosıstema» JShS-niń baspasóz qyzmeti.
Baıǵanın aýdanynyń ákimi Aıbek Kópenovtiń habarlaýynsha, qazirgi kezde shuǵyl jelige 54 turǵynnan ótinish túsken. Aýdanda 5 top qurylyp, olar úılerdi aralap júr.
Eske salaıyq, Aqtóbe oblysynda keshe, 2026 jylǵy 9 shildede keshki ýaqytta daýyl turyp, nóser jaýyn jaýyp, Qaraýylkeldi aýyly jaryqsyz, baılanyssyz qaldy. Birneshe úı men ǵımarattyń shatyry ushty.
