Aqtóbede daýyl kezinde búlingen bilim berý ǵımarattary jańa oqý jylyna deıin jóndele me
AQTÓBE. KAZINFORM — Mektepterdiń, balabaqshanyń terezesi synyp, shatyry ushqan. Bári de qyrkúıek aıyna deıin jóndelýi kerek.
Aqtóbede daýyldan keıin 200-den astam úı jáne birneshe ákimshilik ǵımaraty búlindi. Sonymen qatar mektep, balabaqsha ǵımarattarynda da tereze áınegi shytynap, shatyry ushqan.
— Bilim berý nysandarynyń ishinde mektep, balabaqshalardyń tóbesi ushyp, zaqym kelgen jerleri bar. Qazir tehnıkalyq tekserý júrip jatyr. Tekserý aıaqtalǵannan keıin bilim berý nysandary jóndelip, 1-qyrkúıekke deıin daıyn bolady. Bıýdjetten qarjy bólinip, qalpyna keltiriledi. Sonymen birge mektep-ınternat ǵımaratyndaǵy evakýatsııalyq beketke qonystanǵan otbasylardy aralap shyqtym. Іshinde 20 bala bar. Balalar qala syrtyndaǵy lagerlerge jiberiledi, — dedi Aqtóbe oblystyq bilim basqarmasynyń basshysy Bulbul Kúzembaeva.
Al Aqtóbe oblystyq dene shynyqtyrý jáne sport basqarmasynyń basshysy Meırambek Mahambetovtiń aıtýynsha, daýyl kezinde shatyry ushyp, qabyrǵasy sógilip ketken sport kesheni ázirge jumys istemeıdi. Balalar ózge sport kesheninde jattyǵady. Al júzý sportymen shuǵyldanatyn balalar oblys ortalyǵynda jattyǵady.
— Sport keshenindegi basseındi qoldanýǵa bolmaıdy. Jattyqtyrýshylarmen aqyldasa kelip sportshy balalardy Aqtóbe qalasyna jiberýge sheshim qabyldady. Olar jazǵy demalysta oblys ortalyǵynda jattyǵady, — dedi Meırambek Mahambetov.
Eske salsaq, daýyl men nóser jaýynnan keıingi alǵashqy qorytyndy jasaldy. Onda 300-ge jýyq nysannyń búlingeni anyqtaldy. Ázirge shyǵyn kólemi belgisiz.
