Aqtóbede daryndy oqýshylar tóbelesip, bireýi pyshaq jaraqatymen aýrýhanaǵa tústi

Aqtóbe mektebinde taǵy oqýshylar tóbelesip qaldy. Bul joly óńirdegi eń úzdik, bilimdi balalar oqıtyn mektep-ınternattyń oqýshylary janjaldasyp, biri ekinshisine pyshaq jaraqatyn saldy.

«Balalar arasyndaǵy shekisý senbi kúni tirkeldi. Sol kúni 9-11 synyp oqýshylary úıirmege, sabaqqa kelgen. Sabaq ústinde biriniń qoraby tómen túsip ketip, oqýshylar arasynda balaǵat sóz aıtylǵan. Biri ekinshisiniń sózin kótere almaǵan sekildi. Pyshaq boldy ma, bolmady ma degen suraqqa jaýap bere almaımyn. Oqýshy sol kúni úıine baryp, keıin ata-anasy aýrýhanaǵa jetkizdi. Jábirlenýshi óz úıinen kelip, oqyp júrgen qala balasy. Al jaraqattaǵan aýyl balasy. Ol mekteptiń ınternatynda jatyp, bilim alady», - dedi M.Qusaıynov atyndaǵy Aqtóbe oblystyq daryndy balalarǵa arnalǵan mamandandyrylǵan mektep-ınternatyń dırektory Gúlnar Tájiǵalıeva.



Ustazdary oqýshylardyń sabaq úlgerimi óte jaqsy dep otyr. Al tóbelessip qalǵan oqýshylar 10 «A» jáne 10 «Á» synybynda oqıdy. Qazir pyshaq jaraqatyn alǵan oqýshy oblystyq balalar aýrýhanasynyń hırýrgııa bóliminde em alyp jatyr. Dárigerler ota jasap, pyshaq jaraqatynyń ornyn tigip bergen.

«8 jeltoqsan kúni saǵat 15:00-de jedel járdem brıgadasy 16 jastaǵy balany ákeldi.  Naýqastyń aıtýynsha, saǵat 12:00-der shamasynda Ortalyq bazar mańynda pyshaq jaraqatyn alǵan. Túsken kezde jaǵdaıy ortasha aýyr boldy. Alǵashqy kómek kórsetilip, sol jaq keýde tusyndaǵy jaraqat júrekke jaqyn bolǵan soń ota jasaldy. Qazir balanyń jaǵdaıy ortasha. Pyshaq qıǵash tıgen eken. Tekserý kezinde pyshaq 5-6 sm kirgeni anyqtaldy», - dedi oblystyq balalar aýrýhanasy bas dárigeriniń emdeý isi jónindegi orynbasary Saǵıdolla Dosmaǵambetov.



Dárigerler polıtsııa qyzmetkerlerin de shaqyrǵan.

Eske salsaq, buǵan deıin Aqtóbede qazan aıynda №73 orta mektepte oqýshylary janjaldasyp, biri ekinshisine pyshaq suǵyp alǵan bolatyn.

Keıin mundaı jaǵdaıy №14 orta mektebinde tirkelip, ata-analary qylmystyq jaýapkershilikke tartyldy.