Aqtóbede daryndy balalarǵa aqshalaı sertıfıkat berildi
AQTÓBE. QazAqparat – Aqtóbe oblysynda daryndy balalar marapattaldy. Olarǵa 30 myń jáne 50 myń teńge kóleminde arnaıy sertıfıkattar berildi, dep habarlaıdy QazAqparat tilshisi.
«Daryndy bala – dara bala» atty sharaǵa oblystaǵy úzdik oqýshylar shaqyryldy. Olardyń bári oblystyq, respýblıkalyq olımpıadalardyń jeńimpazdary, halyqaralyq bilim saıysynyń júldegerleri. Oblys ákimi Ońdasyn Orazalın jyldy qorytyndylap, qatarynan oza shyqqan oqýshylarǵa 30 myń jáne 50 myń teńge kóleminde aqshalaı sertıfıkattar berildi. Oblystyq ǵylymı-zertteý zerthanasy men «Jalyn» olımpıadalyq rezerv mektebiniń oqýshylary da marapattaldy.
«Jastarymyz bilimdi, tárbıeli bolsa, elimizdiń erteńi myqty. Búgingi kezdesý jyl boıy bilimmen, ónerimen bıik belesterdi baǵyndyrǵan, oblystyq abyroıyn asqaqtatqan úzdikterdiń basyn qosty. Árdaıym olardy qoldap otyramyn. Oqýshylardyń tabysty nátıjesi ustazdar men balalar eńbeginiń ortaq jemisi, básekege qabiletti adamı kapıtal qalyptastyrýdyń baspaldaǵy. Ustazdarǵa rızashylyǵymdy bildiremin», - dedi oblys ákimi Ońdasyn Orazalın.
Aıta keteıik, búgin Aqtóbede eń úzdik 60 oqýshy «Jas Ulan» qataryna qabyldandy. Olar - oqý ozattary men olımpıada jeńimpazdary. Biryńǵaı «Jas Ulan» jáne «Jas Qyran» balalar men jasóspirimder uıymyna qazir oblys boıynsha 10 myńǵa jýyq oqýshy múshe. Oqýshylar sabaqty jaqsy oqyp, úzdikter qatarynan túspeýge, Otanynyń patrıoty atanyp, bilimdi ári tolerantty azamat bolyp ósýge ant etti.
«Sabaqty úzdik oqyp, el maqtanyshy bolamyn. Maǵan tabıǵatty qorǵaý jumystary unaıdy», - dedi mektep oqýshysy Jansaıa Asanova.
