Aqtóbede «Darý jaryǵy» oftolmologııalyq ortalyǵy ashyldy
ASTANA. QazAqparat - Aqtóbede «Darý jaryǵy» oftolmologııalyq ortalyǵy ashyldy, dep habarlaıdy Aqtóbe oblysy ákimdiginiń baspasóz qyzmeti.
Aýqymdy jobanyń saltanatty túrde iske qosylýyna oblys ákimi Berdibek Saparbaev, basqarmalar men departamentterdiń basshylary, densaýlyq saqtaý jáne medıtsına qaýymdastyǵynyń ardagerleri qatysty.
«Halyqtyń ál-aýqaty men ómir súrý sapasyn arttyrý - Memleket basshysy qoıǵan basty tapsyrmalardyń biri. Osyǵan baılanysty biz búgin batys óńiriniń aýmaǵynda memlekettik-jeke seriktestik aıasynda osyndaı alǵashqy jobany ashyp otyrmyz. Bul qýanyshty oqıǵa Qazaqstannyń eń mańyzdy merekesi - Táýelsizdik kúni qarsańynda ótip otyr», - dedi oblys ákimi.
Ol osy jyldyń ózinde myńnan asa aqtóbeliktiń kúrdeli oftolmologııalyq ota jasatý úshin Astana, Almaty men sheteldik emhanalarǵa júgingenderin atap ótti.
«Endi onyń qajeti joq. Ortalyqta kóz aýrýlaryna erterek dıagnostıka jasap, tıimdi emdelý úshin barynsha qolaıly jaǵdaılar jasalǵan. Munda halyqaralyq deńgeıdegi joǵary mamandandyrylǵan oftolmologııalyq kómekti tek bizdiń oblystyń ǵana emes, Batys Qazaqstannyń barlyq turǵyndarynyń alýǵa múmkindikteri bar»,-dedi B.Saparbaev.
Emhana dırektory Ǵalymjan Eleýovtyń aıtýynsha, medıtsınalyq mekeme Eýropa men AQSh-tyń eń sońǵy úlgidegi emdeý-dıagnostıkalyq quraldarymen jabdyqtalǵan, alty ota jasaıtyn zaly bar. Statsıonar alpys kereýetke shaqtalǵan, emhana kúnine 500 adamdy qabyldaıdy. Dıagnostıka, tekserý men hırýrgııalyq otalar medıtsınalyq kómektiń kepildendirilgen sheńberinde júrgizilmek. Jergilikti dárigerlerden quralǵan mamandar sheteldiń úzdik emhanalarynan tájirıbeden ótip keldi. Júzege asyrylǵan jobanyń jalpy quny 3,8 mlrd. teńge.
