Aqtóbede dárihanalardyń aldynda uzyn-sonar kezek paıda boldy
AQTÓBE. QazAqparat – Aqtóbelikter qyzýdy túsiretin, jedel respıratorlyq vırýstyq ınfektsııaǵa qarsy dárini jappaı satyp alyp jatyr. Oblystyń bas sanıtar dárigeri dári-dármek tapshylyǵy týraly aıtyp berdi, dep habarlaıdy QazAqparat tilshisi.
Aqtóbe oblysy boıynda 671 adam koronavırýs ınfektsııasyna shaldyqqan bolsa, taǵy 389 sımptomsyz jaǵdaı tirkeldi. Ósim - 7,3 paıyz. 357 naýqas jazylyp shyqty.
Úı karantıninde 2343 adam jatyr. Bári medıtsınalyq baqylaý alynǵan. Qazir kópshilik dári-dármekti jappaı satyp alýǵa kóshken. Qarapaıym qyzý túsiretin dáriler dárihanada tapshy.
«Aqtóbe oblysynda 600-den astam dárihana, 15 qoıma bar. Oblystyq taýarlar men kórsetiletin qyzmetter sapasy men qaýipsizdigin baqylaý departamenti baqylaý júrgizip otyr. Antıbıotık pen qyzý túsiretin dári-dármektiń dárihanada azaıǵany baıqalady, biraq qoımada jetkilikti. Turǵyndardyń qorqyp, jappaı satyp alyp jatqany ras. Aıtarymyz - adamdar óz betimen emdelmeýi kerek. Entigip, qyzýy kóterilip, qatty jótelse dáriger shaqyrǵan jón», - dedi oblystyq taýarlar men kórsetiletin qyzmetter sapasy men qaýipsizdigin baqylaý departamentiniń basshysy Nursulý Berkimbaeva.
Aıta keteıik, óńirde ótken túnde ókpeniń qabynýy dertinen 4 adam kóz jumdy. Onyń naqty dıagnozy aıdyń sońynda anyqtalady.
Qazir 10 adam jasandy tynys alý apparatyna qosylǵan.
