Aqtóbede dárigerlik ambýlatorııa jeke úıdiń saraıyn jaldap otyr
AQTÓBE. QazAqparat - Aqtóbe qalasy Aqjar-1 aýylynda 2 myńnan astam halyq shaǵyn medıtsınalyq ambýlatorııada em qabyldaıdy. Munda bir dáriger men eki medbıke jumys isteıdi. Jeke úıdiń aýlasyndaǵy saraıdy jaldap otyrǵan medıtsınalyq mekeme aýylǵa ǵana emes, jan-jaqtaǵy 10-nan astam saıajaı aýmaǵyna kóship kelgen adamdarǵa qyzmet kórsetedi. Ambýlatorııaǵa tirkelgender sany bir jylda 500 adamǵa ósken, dep habarlaıdy QazAqparat tilshisi.
Aqtóbe qalasy irgesindegi Aqjar-1 aýyly Qarǵaly selolyq okrýgine qaraıdy. Bul aýylda áleýmettik nysandardyń bári ótken ǵasyrda salynǵan, tipti, uzaq jyldar boıy naqty orny men ǵımaraty belgilenbegen.
Aýyldaǵy shaǵyn dárigerlik ambýlatorııa «Medıkýs tsentr» JShS-ne qaraıdy. Memlekettik tapsyrysty oryndap otyrǵan jeke medıtsınalyq mekeme uzaq jyldary boıy mekteptiń bir bólmesin jalǵa alyp otyrdy. Al 2014 jyldan bastap óz qyzmetkeriniń saraıyn jalǵa alǵan.
«Bizge dárigerlik ambýlatorııa qajet. Shaǵyn ǵana medıtsınalyq bekettiń ishi tar, kútip otyratyn jerine keıde syımaı qalamyz. Aýylda halyq sany kún sanap artyp keledi. Biz osy jerge qaralyp, keıin bes aıaldamadan keıin ornalasqan ortalyqqa túrli analız tapsyrýǵa baramyz. Eki júris, shyǵyn, ýaqyt»,- deıdi aýyl turǵyny Baqytqalı Jalashev.
Aqjar-1 aýylyndaǵy medıtsınalyq ambýlatorııa aýyldaǵy alty kósheniń 1 myńnan astam turǵyny men «Novyı», «Poısk-1», «Poısk-2», «Vostok», «Solnıchnyı», «Geofızık», «Olımpıst», «Trıkotajnyı», «Býrovık» sekildi onnan astam saıajaıdy mekendegen adamdarǵa qyzmet kórsetedi. Barlyǵy 2300-den astam adam medıtsınalyq beketke tirkelgen. Dáriger Aqmaral Erekeshovanyń aıtýynsha, bir jyl ishinde tirkelgender sany 500-ge artyp otyr.
«Tańǵy saǵat 9:00-den 13:00-ge deıin dáriger qabyldaýy júrgiziledi. Kúnine 35-40 adam qaralady. Al tústen keıin 10-12 shaqyrtýǵa baramyz. Bul jerde ekpe beriledi, sıstema quıylady», - deıdi A.Erekeshova.
Aýyl turǵyndarynyń aıtýynsha, medıtsınalyq mekeme óz qyzmetkeri, ıaǵnı, medbıkeniń saraıyn jalǵa alyp otyr. Qazirgi kúni bir aýla ishinde eki úı jáne medıtsınalyq beketke berilgen saraı tur. Ambýlatorııa 60-tan astam júkti áıelge, bir jasqa tolmaǵan 95 balaǵa qyzmet kórsetedi. Al bes jasqa tolmaǵan balalar sany 700-den asady. Bul balalar birer jylda mektepke barýy tıis. Aýyldaǵy mekteptiń jaıy da máz emes. Mektep úsh aýysymda bilim beredi.
Mektebi eski, úsh aýysymdy. Kezinde bastaýysh klasqa arnap turǵyzylǵan bilim ordasy 32 balaǵa shaqtalǵan. Qazir munda 100-den astam oqýshy bilim alyp júr.
«Uzaq jyldar boıy mektep máselesi sheshilmeı kele jatyr. Qala ákimi tapsyrma berip, qurylys jáne sáýlet bólimi jobalyq-smetalyq qujat pen mekteptiń ornyn ázirlep jatyr. Qujat daıyn bolǵan soń, qurylys máselesi sheshiledi»,- dedi Qarǵaly selolyq okrýginiń ákimi Almaz Álimbaev.
Aıta keteıik, aýylda dárihana da joq. Basy aýyryp, qyzýy kóterilgen kez kelgen adam Qarǵaly selolyq okrýginiń ortalyǵyna barýy tıis. Bul tún ishinde óte qıyn.
