Aqtóbede dárigerlik ambýlatorııa paıdalanýǵa berildi
AQTÓBE. QazAqparat - Naýryz merekesinde óńirde 20 áleýmettik jáne óndiristik nysan iske qosylady. Búgin Aqshat, Ýkraınka, Maǵadjan, K.Nokın men Baýyrlastar aýyldarynda dárigerlik ambýlatorııa jáne feldsher-akýsherlik pýnktteri ashyldy, dep habarlaıdy QazAqparat tilshisi.
Aqtóbede emdeý mekemeleri qoldanysqa berilip jatyr. Buryn eski ǵımarattarda, jaldamaly nysandarda otyryp, halyqqa medıtsınalyq kómek bergen dárigerler jańa oryndarǵa kóshti.
«Baýyrlastar aýylynda emdeý mekemesin salýǵa 83 mıllıon teńge qarjy jumsaldy. Bul jerde Sazdy, Baýyrlastar aýylynyń halqyna alǵashqy medıtsınalyq kómek kórsetiledi. Munda 5 myń adam turady. Emdeý mekemesi kúnine 50 adamdy qabyldaı alady. Jalpy tájirıbeli dáriger, pedıatr jumys isteıdi. Ózgesi keste boıynsha qabyldaý júrgizedi»,- dedi Aqtóbe oblystyq densaýlyq saqtaý basqarmasynyń basshysy Áset Qalıev.
Aıta keteıik, ótken jyly memlekettik-jekeshelik áriptestik aıasynda 21 medıtsınalyq emdeý nysananyń qurylysy bastaldy. Qazirgi kúni onyń 17-si paıdalanýǵa berildi. Ózgesi sáýir, mamyr aılarynda iske qosylady. Aýyl turǵyndaryn oblys ákimi Berdibek Saparbaev quttyqtap, densaýlyq saqtaý salasynda atqarylyp jatqan jumystardy atap ótti.
«Memleket basshysy Nursultan Nazarbaev 26 jyl ishinde halyqtyń densaýlyǵyn saqtaýǵa, osy salany damytýǵa basa nazar aýdardy. Aqtóbe oblysynda ondaǵan medıtsınalyq mekeme qoldanysqa berilip, medıtsınalyq klaster iske asyrylyp jatyr. Bizdiń maqsatymyz - aqtóbelikterdiń sapaly medıtsınalyq kómek alýyna jaǵdaı jasaý. Aqtóbelikter shetelden em izdemeı, jergilikti dárigerlerden kómek alýy tıis»,- dedi óńir basshysy B.Saparbaev.
Sonymen qatar, Mártók aýdanynyń Rodnıkovka jáne Qazan aýyldarynda balabaqsha paıdalanýǵa berilip, Aqtóbede balalarǵa arnalǵan batýt ortalyǵy ashyldy. Muǵaljar aýdanynyń Embi qalasynda merekege «Bujyr batyr» eskertkishiniń tusaýkeseri ótedi. Al Mártók, Baıǵanın, Qobda jáne Shalqar aýdandarynda kondıterlik jáne un kombınattary, suıytylǵan gaz quıý beketi, jol boıyndaǵy servıs nysandary paıdalanýǵa berilip jatyr.
